شهادة جديدة بأعلى عائد في مصر، لأننا نتكلم في فايدة 65% مرة واحدة، فياترى ما تفاصيل هذه الشهادة؟ وموجودة في بنك إيه؟
طيب إمتي تكون أفضل استثمار لفلوسك، وايه الشروط اللي لازم تخلي بالك منها وانت بتشتريها؟ وأهم سوال بقى الشهادة الجديدة مكسبها كام بالظبط؟
شهادة جديدة أعلن عنها البنك العربي الأفريقي، عشان تبقى أحدث الشهادات في مصر، وده بييجي في الوقت اللي البنوك فيه بتتسابق عشان تحافظ على العملا وتجذب عملاء جدد، بس إيه تفاصيل الشهادة دي؟
بص ياسيدي ، الشهادة دي، مدتها 3 سنوات والحد الأدنى لشرائها 5000 جنيه و مضاعفات الالف جنيه، يعني عشان تشتريها محتاج على الاقل 5000 جنيه، وبعد كده تقدر تزود المبلغ براحتك 6000, 7000 جنبه وهكذا.
وكل اللي محتاجه عشان تشتريها بطاقة رقم قومي سارية ووصل مرافق حديث.ودلوقتي بقى نيجي لأهم ميزة في الشهادة وهي العائد التراكمي بنسبة فايدة 65%.
بس هنا لازم تاخد بالك من شرط مهم جدا وهو معاد قبص العائد، لأنه حسب إعلان البنك، العائد تراكمي هتستلمه في نهاية المدة يعني بعد 3 سنين كاملة.
وخلينا دلوقتي نحسبها مع بعض بالأرقام: لو قلنا ان معاك 100 ألف جنيه هتشتري بيهم الشهادة الجديدة من البنك العربي الأفريقي، يبقى مكسبك في نهاية ال3 سنين 65 ألف جنيه.
تعالى بقى نقارن بينها وبين الشهادات الموجودة في باقي البنوك، هتلاقي أشهر منافس ليها هي الشهادة الثلاثية الموجودة في بنك مصر والبنك الاهلي
الشهادة دي عليها فايدة ثابتة 19% سنويا بس الفكرة ان العائد عليها بتقبضه كل شهر، يعني لوقلنا انك هتستثمر فيها 100 ألف جنيه برضه، يبقى هتكسب في السنة الواحدة 19 ألف جنيه َ، وفي ال3 سنين 57 ألف جنيه.
وعلى فكرة الحد الأدنى لشراء شهادات البنك الأهلي وبنك مصر هو ألف جنيه ومضاعفاتها، بس الميزة ان العائد شهري هيساعدك على تحسين دخلك في وسط غلاء الأسعار.
وعموما قيل ماتاخد القرار وتحط فلوسك في أي شهادة، لازم تخلي بالك من نقطة مهمة جدا:
شهادة الادخار هتكون اختيار مناسب ليك لو متأكد انك مش هتحتاج المبلغ اللي معاك طول مدة الشهادة، وده لسبب شرط واحد موجود في أغلب شهادات الادخار في مصر.
والشرط ده بيقول انك متنفعش تكسر الشهادة وتاخد فلوسك قبل مرور 6 شهور على تاريخ شرائها، وحتى ياسيدي لو استنيت ال6 شهور، برضه كسر الشهادة قبل ال3 سنين، بيخسرك جزء من فلوسك تحت اسم غرامة الاسترداد
وقيمة الغرامة دي بيحددها كل بنك حسب ظروفه وتقدر تعرفها من خلال حاجة اسمها جدول الاسترداد في البنك.
أما بقى لو معاك مبلغ هتحتاجه قريب بس مش عاوز تركنه جنبك وتشغله لحد ماييجي وقته، ممكن تفكر في حسابات التوفير.وعلى فكرة البنك العربي الافريقي بيقدم حساب توفير جولدن بلس بفايدة تصل إلى 20%
ومن حقك تحدد دورية العائد اللي انت عاوزها سواء كانت دورية العائد الشهرى18% أو دورية العائد الربع السنوى 18.5٪ أو دورية العائد النصف سنوى 19 % أو دورية العائد السنوى 20%
بس خد بالك الخد الأدنى لفتح حساب التوفير جولدن بلس هو 250,000 جنيه، والحد الأدني لاحتساب العائد مبلغ 50000 جنيه.
ودلوقتي بقى نيجي لآخر سؤال مهم معانا: هل الشهاده الجديدة من البنك العربي الافريقي هتكون مقدمه لشهادات تانية الفتره الجايه؟
بص يا سيدي طرح شهادات جديدة عادة بيكون مرتبط برفع البنك المركزي لسعر الفايدة في مصر.وصحيح البنك المركزي ثبت سعر الفائده في اجتماعه الاخير في سبتمبر لكن في توقعات من برفعها الفترة الجاية.
وحسب سارة سعادة من “سي.آي كابيتال” تثبيت الفايدة في الاجتماع الأخير مش النهاية، ونتوقع رفعها أكتر من مرة الفترة الجاية.
ودلوقتي بقى انت شايف إن شهادات الادخار أفضل استثمار دلوقتي في البنوك ولا ممكن تفكر في الودائع أو حسابات التوفير؟
