انتظروا وستجدوا كيلو اللحمه ب 130 جنيه، نعم 130 جنيه ومتقلقوش، هذه لحمة على الفرازة وعليها الختم. فياتري ما مصدر هذه اللحمة ؟ وما سر انخفاض سعرها عن باقي الأنواع في السوق؟ تابعونا سنكشف كافة التفاصيل من خلال التقرير التالي:
بوست متداول على الفيسبوك بيعلن عن ضخ 800 طن لحمة شهريا في مصر، وسعر البيع 130 جنيه للكيلو..دور بقى على اصل المعلومة هتوصل لدولة تشاد ، ايو تشاد في أفريقيا، واحدة من اغنى الدول بالثروة الحيوانية في القارة السمراء، بسبب مميزات كتير منها:
مساحات المراعي الواسعة والمناخ المناسب ووفرة المياه بسبب سقوط الأمطار لفترة كبيرة من السنة.عشان كده حزب حماة وطن، ومن خلال الشركة الوطنية الكويتية، قرر يفتح مزراع لتسمين العجول في تشاد، وتوريدها مبردة إلى مصر..
وقبل ماتسأل.. الوطنية الكويتية هي شركة قطاع خاص لتنمية الثروة الحيوانية، وعبارة عن شراكة بين 3 مستثمرين من الكويت و2 من مصر.
والمهم ان الشركة دي مع ارتفاع أسعار اللحوم في مصر وتسجيل الكيلو 250 جنيه، قررت تدور على مصدر جديد للحمة، بعيدا عن السودان والبرازيل.
وهنا وقع على الاختيار على تشاد بإنشاء مجموعة من المزارع في العاصمة تحت اسم شركة سايبو فودز وبعدين نقلها إلى مجزر الفرشا لتجهيزها، واخيرا نقلها إلى مصر عن طريق طيارات شركة مصر للطيران.
و متقلقش كله على الشريعة الإسلامية، لأن تشاد اصلا دولة مسلمة، كمان في فريق من وزارة الزراعة وهيئة الطب البيطري هيبقى موجود هناك للإشراف على كل المراحل.
والهدف دلوقتي هو توريد 200 طن لمصر كل أسبوع، يعني 800 طن في الشهر، وزي ماقلنا في أول الفيديو سعر الكيلو هيبقى 130 جنيه بس، يعني أرخص من اللحمة السوداني.
وعلى فكرة تربية العجول معتمدة على تركيبة الاعلاف المصرية، يعني مش هتلاقوا تغيير كبير في اللون أو الطعم أو الريحة عن اللحمة البلدي.
كمان رئيس الشركة بيوعد ان التجهيز والنقل من تشاد لمصر ومن بعدها الطرح في الأسواق هيكون كله خلال يوم واحد بس.
والمفاجأة الأكبر في طريقة السداد لأننا مش هنحتاج اي دولار، الشركة هتاخد بضايع من مصر تبيعها في تشاد وبفلوسها تشتري العجول وتوردها لمصر.
وعشان تبقى عارف، مجزر الفرشا من أكبر المؤسسات في افريقيا وبيورد شغله للسودان والكاميرون ودول الخليج وأوروبا وتركيا.والمفروض ان اللحمة هتتباع في منافذ الحكومة و50 منفذ تابعين للحزب خلال الاسابيع الجاية.
بص بقى على أرخص سعر للحمة دلوقتي في معارض اهلا رمضان ومنافذ التموين، هتلاقي كيلو اللحوم البلدي بسعر 190 جنيه، وكيلو اللحوم البرازيلي المجمدة ب 120 جنيه، والسوداني الطازج بسعر 165 جنيه للكيلو الواحد.
انتى بقى اخر مرة اشتريتوا اللحمة كانت بكام؟ وهل جربتوا اللحمة الموجودة في معارض اهلا رمضان؟ طيب بدأتوا تشتروا اللي هتحتاجوه في الشهر الكريم ولا هستنى اللحمة التشادي؟
