اللبن الفترة الأخيرة أسعاره ارتفعت بشكل مبالغ فيه وسعر الكيلو وصل لأكثر من 30 جنيه، لكن يا ترى ما سبب هذا الارتفاع؟ وهل ستشهد الأسعار الفترة القادمة انخفاضا ان سنظل نواجه ارتفاعات جديدة؟ تابعونا لمعرفة التفاصيل..
أسعار اللبن في الشهور الأخيرة ارتفعت لأكتر من 30 جنيه للكيلو وده خلى ناس كتير تبطل تشتريه، ودايما تسأل هو ليه اللبن ارتفع بالشكل ده خصوصا أنه صناعة محلية ومش بنستورده.
بحسب تصريحات حازم المنوفي عضو شعبة المواد الغذائية في برنامج صالة التحرير واللي قال إن تجار اللبن رفضوا دعوة الاتحاد الغرف التجارية بتخفيض الأسعار، وأنهم بدل ما يعملو عروض علي كمية كبيرة من المنتجات يخفضوا سعر كل منتج لوحده.
وكمل وقال أن السوق بيعاني من حالة ركود بسبب ارتفاع الأسعار ودلوقتي عندنا وفرة من منتجات الألبان والجبن وعشان كده لازم نخفض الأسعار و نحرك السوق.
وقال كمان أن منتجين اللبن وقت أي أزمة بيرفعوا السعر ولما الوضع يستقر يرفضوا يرجعوا الأسعار لطبيعتها عشان يحفظوا على مكسبهم.
مع أن في منتجات كتير أسعارها انخفضت خلال الفترة الأخيرة زي الرز والقمح، وده اللي خلى الإعلامية عزة مصطفى تطلب من المواطنين خلال برنامجها صالة التحرير انهم ميشتروش أي عروض ألبان لحد ما يخفضوا الأسعار.وساعتها التجار غصب عنهم هيخفضوها.
حازم المنوفي قال كمان في تصريحاته في برنامج الحكاية مع عمرو أديب أن المنتجين قرروا يخفضوا إنتاجهم 50% وده بسبب انخفاض مبيعاتهم
وده بعض ما عرضنا عليهم أنهم يخفضوا الأسعار عشان ننعش المبيعات في السوق، لكن السؤال هنا إيه سبب ارتفاع أسعار الألبان رغم انها صناعة محلية؟
بحسب حازم المنوفي قال إن 40% من منتجات الألبان بتعتمد على اللبن البوردة وده بيتم استيراده من بره، عشان كده تكاليف الإنتاج بتزيد ده بالإضافة لسعر الصرف في مصر.
وقال كمان أن مصر بتنتج كميات كبيرة من اللبن لكن رغم كده في منتجات لازم يدخل فيها اللبن البودرة،طيب ياترا أسعار اللبن ارتفعت قد ايه؟
أنا أقولك أسعار اللبن ارتفعت 30% خلال السنه دي و 10% خلال ال6 شهور الأخيرة وسعر علبة اللبن دلوقتي وصلت دلوقتي ما بين 28 و 30 جنيه وده بحسب حازم المنوفي
أما محمد الطاروطي رئيس الجمعية المصرية لمنتجي الألبان قال في تصريحات لموقع القاهرة 24 أن معدل انتاج مزارع الألبان قل بنسبة 30% من بعد رمضان، وده لأن شركات منتجات الألبان خفضت انتاجها بسبب تراجع القوى الشرائية وارتفاع تكلفة الإنتاج.
وبحسب تصريحات محمد الدماطي الرئيس السابق لشعبة الألبان، خلال برنامج الحكاية أن حدث انخفاض في إنتاج اللبن ووزارة الزراعة على علم بده.
وقال كمان أن المصانع اضطرت لخفض كميات اللبن بسبب تراجع القوة الشرائية نتيجة ارتفاع الأسعار، وقال ان تذبذب الأسعار اللي بنشهده خصوصا في العلف ده سبب ارتفاع الأسعار عشان كده لازم يحصل استقرار عشان نخفض الأسعار.
وقال ان لو تم التسعير المنتجات بسعر غير منطقي والمستهلك متقبلوش هتحصل خساير كبيرة جدا.
ودلوقتي قولنا بتشتري كيلو اللبن كام؟
