الرئيس السيسي قرر أنه يخلص بنفسه أزمة الدولار، بعد ما الموضوع وصل كما يقولوا للذروة، لكن ماذا فعل السيسي وما الإجراءات العاجلة التي أمر الحكومة بتنفيذها فورا.
أزمة الدولار بقت موضوع مقلق جدا الصراحة.. ومحدش بقى متخيل اللي هيحصل الفترة الجاية.. خاصة في الأسعار.. لأن ببساطة محدش عارف يسيطر على أزمة الدولار.
لكن السؤال .. ما هو فلوس صفقة رأس الحكمة جت خلاص من الإمارات، لسه فيه أزمة دولار؟خليني بس اقولك إن لو الفلوس ما اتصرفتش في طريقها أو مكانها الصحيح هيكون فيه أزمة كبيرة.
وده اللي خلى الرئيس السيسي يدخل بشكل مباشر لإنهاء الأزمة، عشان البلد تقدر تكمل في ظل أوضاع اقتصادية صعبة جدا.
كمان خليني أقولكم إن ملف ازمة أصبح وبشكل مباشر تحت إشراف الرئيس عبد الفتاح السيسي شخصيا.وواضح كده انه ناوي ميسبش الملف الا لما ينهي تماما أزمة الدولار في السوق الموازية.. ومش بس أزمة توفير الدولار لا وكمان إنهاء السوق السوداء تماما.. يعني ميكنش ليه وجود.
طيب ايه الإجراءات اللي الرئيس السيسي اخدها عشان ينهي أزمة الدولار بشكل نهائي؟بص ياسيدي الحقيقة الحكومة وكل أجهزة الدولة اشتغلت في اكتر من اتجاه عشان تخلصنا من أزمة الدولار.. أول حاجه هي جذب استثمارات مباشرة للبلد .. وده اللي حصل في صفقة راس الحكمة واللي قلبت الدنيا.
وخليني أقولك إن الرئيس السيسي لعب دور كبير في الصفقة والتوفيق مع الجانب الإماراتي، لأن صفقة بالحجم ده.. هتكون استثماراتها حوالي 185 مليار دولار، منهم 35 مليار دولار هيوصلوا مصر بشكل عاجل خلال شهرين.. هتخل جزء كبير من الازمة.
وطبعا غير السيولة الدولارية اللي هتوفرها الصفقة وهيكون ليها طبعا تأثير مباشر على الاستثمارات اللي بتفكر تدخل مصر.. لأن ده صفقة تعتبر شهادة ثقة في الاقتصاد المصري.
وغير الاستثمارات في والصفقة، عندك اتفاقيات تبادل العملة اللي عملته مصر بتوجيه مباشر من القيادة السياسية مع دول البريكس.
وده تحالف بتقوده روسيا والصين والهند، بيتسحوذ على نسبة كبيرة جدا من الاقتصاد العالمي.. والتبادل التجاري بين مصر ودول البريكس.. هيخفف طبعا من الضغط على الدولار.
اما الإجراء الأخير فهو ملاحقة تجار السوق السوداء. اللي الحكومة اخدتهم تارجت الصراحة.. ونجحت خلال الفترة الأخيرة في ضبط عدد كبير منهم، ومعاهم ملايين الدولارات.. وده خلى السوق يهدأ شوية!
يعني 3 إجراءات كان ليهم تأثير كبير على أزمة الدولار في مصر لأن كل إجراء فيهم ليه تبعات تانية برده هتاثر على الاقتصاد..
ده غير طبعا خطة الحكومة للتخارج من الأصول الحكومية.. وتوسيع المجال للقطاع الخاص.. وده ظهر في اكتر من مناسبة .. من طرح شركات قطاع عام وفنادق وفيه كلام على المطارات.
سؤال أخير.. ليه ملف القضاء على السوق السودا للدولار مهم!القضاء على السوق السودا مهم جدا.. ومهم جدا انه ميكنش فيه اكتر من سعر للدولار.. لأن تأثير ده سلبي على جذب الاستثمارات الأجنبية المباشرة وكمان بياثر بشكل مبالغ فيه على الأسواق واسعار السلع.
وخليني أقولك إن بعد قرارات الحكومة والإجراءات اللي حصلت ومن قبلهم صفقة رأس الحكمة.. شوفنا الدولار مش بس بينزل لا ده كمان بينهار بشكل كبير.
يعني بعد ما كان وصل إلى 72 جنيه في يوم من الايام.. دلوقتي الدولار نزل أقل من 40 جنيه.. وده طبعا بيقلل الفجوة بين السعر الرسمي والسوق الموازية.
ولسه لما الدولار يتوفر.. هتشوف اللي محتاج دولار يروح البنك ياخده بدل ما يروح السوق السوداء.. يعني كده مش هيكون فيه سوق سوداء اصلا!
