لو كل الدول أعطت ظهرها للدولار واستخدمت عملتها في التجارة الدولية لن نعرف نعاقبهم..هذا تصريح لعضو في مجلس النواب الأمريكي اسمه ماركو بيرو، يوضح أنه يوجد ناس داخل امريكا مرعوبة من انتهاء هيمنة الدولار على العالم.
فهل فعلا الدولار في آخر أيامه؟ ولا دي زوبعة في فنجان والأخضر هيفضل مسيطر على اقتصاد العالم؟ وإيه اللي بتعمله الصين ضد الدولار؟ واحنا في مصر موقفنا إيه؟
الحرب مش بس جيش قصاد جيش، لا دي كمان اقتصاد قصاد اقتصاد والشاطر اللي يحط عملته فوق الكل. وده اللي عملته أمريكا طول السنين الي فاتت، لما خلت الدولار العملة الأولى في التجارة الدولية واحتياطات البنوك المركزية على مستوى العالم.
فهل ده وقت التغيير؟
مجلس الوزرا نشر انفوجراف عن مؤسسة أوراسيا ريفيو الأمريكية، بترصد فيه تحركات الصين المنافس الأول لامريكا عشان تخلي اليوان مكان الدولار كعملة وسيطة في معاملات التجارة الدولية..
وحسب الانفوجراف ده، الدولار كان بيمثل 71% من حجم الاحتياطات الأجنبية بالبنوك المركزية في الدول الكبيرة. لكن على مدار 23 سنه النسبة دي قلت إلى 58%
وحاليا 50% من معاملات الاستيراد والتصدير بين الدول بتعتمد على الدولار، لكن لو العالم استمر في البحث عن بديل للدولار وانخفضت النسبه دي كمان بحوالي التلت، فمن المتوقع تراجع حصة الدولار من الاحتياطات الاجنبيه إلى 40%.
وده يبينلك حجم تهديد اليوان الصيني للدولار الأمريكي، خصوصا ان الصين الفترة الاخيرة واخدة العالم رايح جاي عشان تقنع الدول باستخدام العملات المحلية في التجارة الدولية.
وقدرت تنفذ ده مع دول مهمة زي روسيا والبرازيل اكبر اقتصاد في امريكا اللاتينيه وكمان فرنسا اللي اشترت صفقه غاز من الامارات ودفعت تمنها باليوان الصيني انت متخيل.
واحنا في مصر بدأنا نتعامل بالروبل مع روسيا وبنفكر نتعامل بالروبيه مع الهند واليوان مع الصين، عشان نقلل الطلب على الدولار.
والاهم من ده كله، التقارير عن مفاوضات بين السعوديه والصين لبيع النفط باليوان الصيني، وده لو حصل هيبقى ضربة كبيرة للدولار اللي واخد معظم قوته من البترو دولار، طيب ايه البترو دولار ده ؟
ببساطه يا سيدي امريكا اتفقت مع السعوديه في السبعينات على تسعير النفط بالدولار يعني اي دوله عاوزه تشتري نفط من السعوديه او غيرها هتشتريه بالدولار بس، وطبعا ده بيزود الطلب عليه ويخليه العمله الأولى في العالم.
وضيف على كده كمان، التوقعات العالمية بتراجع قيمة الدولار 15% خلال 18 شهر، وحسب وكالة بلومبرج اي تراجع في قيمة الدولار بيقلل الضغط على عملات الأسواق الناشئة، واللي مصر منها.وده ياخدنا لأهم سؤال: هل الصين هتقدر على امريكا والدولار؟
الاقتصادي أيمن عبد العزيز، شايف إن تحركات الصين بتأكد ان في قوي تانية بدأت تناطح الدولار وتهز عرشه.
بس رغم كده هيفضل الدولار العملة الأولي في العالم لوقت طويل، وقدامنا كتير أوي عشان نقول ان اليوان بقوة الدولار
وخصوصا يعني ان العملة الأمريكية واخدة قوتها من حاجتين: الأولى ربط بيع النفط بالدولار زي ماقلنا، والتانية إقرار الدولار كعملة احتياطية للعالم بعد الحرب العالمية التانية.
انتوا بقي قوللنا توقعاتكم إيه، وازاي نستفيد من الخناقة اللي دايرة بين الصين وامريكا؟
