حالة من القلق والخوف بين المواطنين بعد طرح الشهادات الجديدة من بنك مصر والبنك الاهلي، خوفا من طرح بعدها شهادات بفائدة أعلى.
فهل ممكن البنوك الخاصة تعمل كده فعلا؟ وهل في احتمال بطرح شهادات استثنائية بفايدة 25% أو 30% خلال شهر أو اتنين؟
طيب هل في بدائل للشهادات الجديدة؟ ولو هتختار بينهم ، إيه الأفضل: شهادة ال 19% بفايدة ثابتة، ولا شهادة ال22% بفايدة متناقصة؟
دلوقتي البنك الاهلي وبنك مصر نزلوا شهادات جديدة، الشهادة الأولى مدتها 3 سنين بفايدة ثابتة 19% سنويا والعائد شهري، بحد أدنى للشراء ألف جنيه ومضاعفاتها.
والشهادة التانية ثلاثية برضه، بس بفايدة متناقصة، يعني العائد في السنة الاولى 22%، والسنة التانبة 18%، والسنة التالتة والاخيرة 16%.
والعائد برضه شهري بس بيتحسب على اساس الفايدة المعلنة في كل سنة.
وطبعا لما تقارن الفايدة على الشهادات الجديدة هتلاقيها أقل من معدل التضخم، عشان كده لسة في ناس عندها امل في طرح شهادات استثنائية جديدة زي شهادة ال18% ومن بعدها شهادة ال25%.
بس لغاية دلوقتي يحي ابو الفتوح نائب رئيس البنك الأهلي نفى اي نية لاصدار شهادات بفايدة 25٪ أو 30%.
كمان لو بصيت على بيان البنك بعد طرح الشهادات الجديدة، هتعرف انه شايف الوقت الحالي هو ذرة التضخم وارتفاع الأسعار، وبداية من السنة الجاية معدلات التضخم هتبدأ تقل تدريجيا، وده السبب اللي خلاه يطرح شهادة بفايدة متناقصة.
وده بيخلي احتمالات طرح شهادة استثنائية لمدة سنة أو سنة نص بفايدة مرتفعة صعب جدا.
أما بقى لو هنتكلم عن البنوك الخاصة، فاحنا عندنا لجان الاليكو المسؤولة عن تحديد سعر الفايدة على القروض أو الودائع المقدمة للعملا ، وحسب المصادر اللجان دي في اجتماعات حاليا عشان تشوف هتعمل ايه.
وخد بالك ان قرارهم معتمد على اكتر من حاجة أهمها أسعار الفايدة على شهادات بنكي الأهلي ومصر، وصعب جدا يطرحوا شهادات بفايدة أعلى منها
ولو خدنا نظرة سريعة على الشهادات الموجودة حاليا في البنوك بخلاف بنكي الأهلي ومصر، هنلاقي المنافس الأول هو بنك ناصر الاجتماعي، لأنه بيقدم 3 شهادات بأسعار فايدة مرتفعة:
والاولى هي شهادة ثلاثية تراكمي بسعر الفائدة 22% يصرف العائد في نهاية المدة.
والتانية شهادة سنة ونص بسعر فايدة 20% ويصرف العائد عند الاستحقاق.
واخيرا الشهادة الثلاثية “رد الجميل” لكبار السن من 60 سنة وانت طالع.
والشهادة دي متاحة بسعر فايدة هو 17.75% للعائد الشهري أو19.25% للعائد السنوي ويبدأ الشراء من أول ألف جنيه.
وهنا بقى ييجي اخر سؤال، إيه أفضل اختيار؟
بص ياسيدي لو معاك مبلغ مش محتاجه دلوقتي, ممكن تفكر في الدهب أو شهادة السنة ونص من بنك ناصر.لكن لو انت محتاج عائد شهري يحسن دخلك وسط الغلا اللي حنا فيه، يبقى شهادات الادخار الجديدة من بنكي الأهلي ومصر خيارك الوحيد.
ولو بتسأل إيه الأفضل بينهم شهادة ال19% ولا شهادة الفايدة المناقصة؟خلينا نفترض ان معاك 100 ألف جنيه، في شهادة ال19% مكسب النهائي هيبقى 57 ألف جنيه، وفي الشهادة المتناقصة 56 ألف جنيه.
يعني لو حسبناها بالأرقام شهادة ال19% تكسب، لكن لو التزاماتك كتيرة السنة دي ممكن تضحي بالالف جنيه وتختار الشهادة المتناقصة لأنها هتديك عائد 22% في اول سنة، وطبعا انت صاحب القرار.
ودلوقتي بقا شاركونا برأيكم في شهادات الادخار الجديدة؟ وهل العائد مغري بالنسبة ليكم عشان تشتروها ولا هتدوروا على اختيارات تانية؟
