كيف ستنتهي لعبة الدولار والجنيه؟ وهل لا يوجد مفر من التعويم الرابع؟ وما السر؟ وهل تخفيض الجنيه شرط أساسي لتنفيذ الطروحات الحكوميى التي أعلنت عنها الحكومة لتوفير الدولار؟ تابعونا سنكشف كافة التفاصيل من خلال التقرير التالي:
أسئلة كتير جدا تبان تقيلة وتحير، لكن إوعي تفتكر انها للمتخصصين وبس، لان الإجابة عليها بتحدد قيمة الجنيه اللي في جيبك وسعر الرز والزيت اللي بتشتريه.. عشان كده خليك معانا في الفيديو ده هتعرف الدنيا رايحة على فين
في الايام اللي فاتت، الكلام عن مستقبل الجنيه أمام الدولار ملوش أول من آخر: توقعات من بنوك عالمية.. وتحليلات لخبراء ومؤسسات مصرية.
والشاهد في وسط كل ده، انه يوم ورا التاني احتمالات هبوط قيمة الجنيه بتزيد: وهنا بقى بييجي الخلاف: هل المصريين في انتظار تعويم جديد بمعنى الكلمة؟ ولا تحريك بسيط؟
بنوك عالمية زي HSBC كريدي سويس وسوسيتيه جنرال شايفين إن الدولار بيتحرك في المساحة مابين 32 إلى 35 جنيه على المدى القصير، واحتمال نشوف الهبوط ده في شهر مارس الجاري.
لكن اختلف معاهم، محمد ماهر، رئيس الجمعية المصرية للأوراق المالية، واللي كان متفائل شوية، علشان كده توقع حدوث تحريك بسيط في سعر الدولار، وفي الأول والآخر القرار يرجع للبنك المركزي.
سر تراجع الجنيه أمام الدولار
بص ياسيدي، رئيس الجمعية المصرية للأوراق المالية قال التوقع ده تعليقا على الاخبار المنتشرة في الوكالات العالمية بإن الاستثمارات الاجنبية مش هتيجي مصر إلا بعد توضيح العلاقة بين الجنيه والدولار.
وده سببه الاختلاف في طريقة تقييم الجنيه في برنامج الطروحات الحكومية، وببساطة كده الحكومة وهي الطرف البائع في الصفقة شايفة ان سعر الدولار مقابل الجنيه حاليًا سعر عادل، بس في المقابل المستثمر اللي هيشتري شايف العكس.
ويمكن تحريك سعر صرف الدولار لـ3 مرات في سنة واحدة من 15 جنيه و70 قرش لأكتر من 30 جنيه، خلى البعض مستني انخفاض اكتر في قيمة الجنيه، خصوصا مع استمرار نقص العملات الأجنبية، وطبعا ده هيخلي مصر وتحديدا الجنيه تحت ضغوط مستمرة.
وده ياخدنا لآخر سؤال: طيب ليه المستثمرين مصرين اوي كده على تخفيض قيمة الجنيه للمرة الرابعة؟
لانه لو دخل اشتري حصة الحكومة في الشركة على اساس الدولار ب31 جنيه مثلا، وبعدها الجنيه بقى ب 32 هيبقى خسر جزء من فلوسه، الصفقة اللي كلفته 10 دولار مثلا، كان ممكن تكلفه 8 دولار بس.
ولو لاحظتوا تحركات سعر الصرف خلال الأيام الأخيرة. هتلاقوا ان الجنيه في صعود شبه مستمر لكن تدريجي، فهل تتوقعوا اننا هنفضل نتحرك بنفس الطريقة ولا هنتفاجأ مرة واحدة بهبوط حاد في قيمة الجنيه زي ما حصل قبل كده؟
شاركونا في التعليقات.. وقوللنا توقعاتكم لسعر الدولار.
