استعدوا.. التعويم الخامس للجنيه قبل رمضان/ وصفقة رأس الحكمة هي السر، لكن ما علاقتها بالجنيه؟ وكم سيصبح سعر الدولار ؟ وهل هذا سيكون التعويم الأخير؟ وما سر هذا التوقيت؟
بنك عالمي يكشف تفاصيل جديدة عن كواليس اللي بيدور في دواليب الحكومة.. سنعرفها خلال التقرير التالي:
تقرير جديد من بنك مورجان ستانلي حط فيه النقط على الحروف، وقال إن مصر هتخفض قيمة الجنيه، عشان يسجل الدولار في البنك ماين 40 إلى 45 جنيه، وده كله هيحصل قبل رمضان، يعني بنتكلم على اسبوعين تقريبا.
وحسب البنك، دي هتبقى الخطوة الأخيرة عشان يتم الاتفاق بين مصر وصندوق النقد على قرض جديد بقيمة 10 مليار دولار، وخصوصا ان الصندوق لأكتر من مرة طلب من مصر الاعتماد على نظام سعر مرن في سعر الصرف، يعني المفروض ان البنك المركزي يسيب الجنيه منه للدولار، وحجم العرض والطلب في السوق هو اللي يحدد أسعار العملة.
بس من الواضح كده،. ان مصر وصندوق النقد اتفقوا يقسموا البلد نصين، بمعنى اننا هنرفع سعر الدولار رسميا عشان يقرب من سعره في السوق الموازية، بس في نفس الوقت، البنك المركزي هيفضل يدعم الجنيه برضه ومش هيسيب السوق يحدد سعر الدولار لوحده.
ما علاقة صفقة رأس الحكمة بالتعويم الجديد للجنيه؟
بص يا سيدي، اللي كان مانع مصر من تحريك سعر الدولار رسميا هو نقص السيوله الدولارية. وببساطه كده: ما ينفعش تسمح برفع سعر الدولار أو تحرير سعر الصرف وانت معندكش في البنك الدولار الكافي اللي يغطي احتياجات السوق.
لأنك لو عملت كده تبقى دخلت نفسك في مغامرة
مش محسوبة، واديت فرصة أكبر للسوق السوداء انها تلعب بالأسعار لأن في الأول وفي الآخر التاجر مش هيجيلك انت هو هيروح للسوق السوداء عشان يشتري منها الدولار اللي محتاجه ويبقى كأنك يا أبو زيد ماغزيت.
لكن دلوقتي وبعد صفقه راس الحكمه المفروض البلد يدخلها 35 مليار دولار خلال شهرين وهيتقسموا على دفعتين:
الدفعه الاولى هتكون جزئين: الجزء الاول 10 مليار دولار هيدخلوا فورا خلال أيام، مع تنازل الامارات عن 5 مليار دولار من ودائعها في البنك المركزي.
والدفعة التانية بعد شهرين بإجمالي 20 مليار دولار، منهم 14 مليار دولار هيدخلوا البلد جديد، و6 مليار موجودين ودائع في البنك المركزي.
والمفروض إن البنك المركزي هيحول قيمة الودايع لمبالغ بالجنيه المصري عشان تدخل في مشروع رأس الحكمة.
يعني السيولة الدولارية الجديدة قيمتها 24 مليار دولار، بالإضافة لخصم 11 مليار دولار من الدين المصري الخارجي.
ومن وقت الإعلان عن صفقة راس الحكمة، ودولار السوق السودة في انهيار شديد عشان يسجل دلوقتي مابين 49 إلى 50 جنيه، وبرصة سهر الدهب نزل لمستوى 3000 جنيه للجرام عيار 21.
والمهم انه حسب رئيس الوزراء.. صفقة راس الحكمة مس هتكون الأخيرة ، لأن الحكومة عندها مخطط كامل لتنمية مدن الساحل الشمالي زي جروجوب رأس جميلة والسلوم.
والصفقة هى شراكة مش بيع أصول، وحسب رئيس الوزرا مشروع رأس الحكمة أكبر مشروع استثماري في تاريخ مصر، لبناء فنادق ومشروعات ترفيهية، ومنطقة المال والأعمال، مع تطوير وإنشاء مطار دولي جنوب مدينة رأس الحكمة، بهدف جذب ٥٠ مليون سائح.
وانت بقى رأيك إيه؟: هل البنك المركزي هيرفع سعر الدولار في البنك قبل رمضان فعلا؟ وهل سعر 45 جنيه الدولار هيكون مرضي وهيوقف السوق السودة؟
