هل يرتفع سعر البنزين الفترة القادمة؟ سؤال يحير ويشغل بال المواطنين خلال الفترة الماضية، وذلك بعد تأثير ارتفاع سعر الدولار على كافة السلع في مصر، ولكن إن كنت تريد أن تعرف إجابة السؤال وحقيقة رفع سعر البنزين في 2023، فتابعنا من خلال التقرير التالي:
المفترض إنه بيتم الإعلان عن أسعار البنزين الجديدة 2023 خلال شهر يناير وأبريل ويوليو وأكتوبر من كل عام، والقرار طبعًا ممكن يكون في زيادة أو تثبيت أو انخفاض لأسعار بيع بعض المنتجات البترولية في السوق المحلية ارتفاعًا وانخفاضًا، واللي بيتحدد على حسب التغيرات اللي بتحصل في السوق، يعني مثلا احنا بنتأثر تلقائيًا بالسعر العالمي لبرميل خام برنت وسعر صرف الدولار أمام الجنيه المصري.
ولكن اللي يطمن إن لجنة التسعير التلقائي لأسعار البنزين الجديدة 2023 بتاخد قرارها بس بتراعي فيه إن نسبة الزيادة أو الخفض ما تزدش عن 10%، عشان المواطن ميتأثرش ولا يحس بأعباء زيادة.
خبراء الاقتصاد توقعوا إن الحكومة ترفع أسعار البنزين والسولار خلال اجتماع لجنة التسعير التلقائي للمواد البترولية المنتظر الشهر الجاري بنسبة 10%، وقالوا إن توقعاتهم برفع أسعار الوقود بسبب ارتفاع سعر الدولار مقابل الجنيه في الشهور الأخيرة، ده كمان غير زيادة سعر السولار عالميا واللي حصل نتيجة مشكلات خاصة بتكرير السولار وتوقف بعض المصافي في أوروبا.
قالو كمان إنهم متأكدين إن القرار رفع الأسعار تم تأجيله من أكتوبر عشان كده متوقع يتنفذ في يناير، وإنه أسعار البنزين والسولار هتزيد في حدود بين 25 و50 قرشا للتر، والقرار ده هيساعد الحكومة إنها تغطي جزء من التكاليف المرتبطة بانخفاض قيمة العملة.
طب إزاي احنا هنرفع السعر وهي بيقل عالميًا؟
هقولك يا سيدي، فعلا على الرغم من انخفاض سعر البترول الخام عالميًا، لكن الخبراء قالوا إن الحكومة بتواجه ضغوط في سعر الصرف خاصة مع ارتفاع سعر الدولار مقابل الجنيه واللي بدورها رفعت تكاليف استيراد المنتجات البترولية ، غير كمان أسعار بعض المنتجات البترولية المكررة زي السولار والديزل اللي ترتفع عالميا بشكل كبير وده طبعًا بيضغط على الموازنة العامة للدولة خاصة وأن السلع دي لسه مدعومة من الموازنة.
وكانت الحكومة ثبتت في شهر أكتوبر الماضي أسعار البنزين والسولار للربع الرابع من 2022، لكن القرار ده جه بعد ما رفعت أسعار البنزين 6 مرات متتالية كان آخرها في يوليو 2022.
والأسعار في وقتنا ده هي 8 جنيهات للتر بنزين 80، و9.25 جنيه للتر بنزين 92، و10.75 جنيه للتر بنزين 95، و7.25 جنيه للتر للسولار، أما بقى سعر بيع طن المازوت لغير استخدامات الكهرباء والمخابز هو 5000 جنيه للطن.
قولنا هل انت شايف إن أسعار البنزين هتزيد فعلا؟
