حالة من القلق انتابت المواطنين بعد رفع أسعار السولار خوفا من تاثير القرار على سعر الخبز، ولكن الحكومة طمأنت المواطنين، ولكن أن ثبت سعر الخبز المدعم فهل يتأثر سعر الخبز السياحي، تابعونا لمعرفة التفاصيل:
معروف إن بعد زيادة أي منتج من المنتجات البترولية زي البنزين والسولار إنه بيحصل زيادة طفيفة في الأسعار وده لأن الأكل اللي بيجي في الأسواق والمحلات ده بيمر بمراحل كتيرة أهمها مرحلة نقله من مكان لمكان وده بيزود تكلفة أي منتج وبالتالي زيادة السولار بتأثر عليه
وطبعا أهم سلعة عند المصريين هي العيش وعشان كده بعد ما أعلنت الحكومة زيادة أسعار السولار جنيه واحد بدأت الناس تقلق من أنه يتأثر ويزيد سعره.
لكن الحكومة صرحت بعد صدور قرار لجنة التسعير التلقائي للمواد البتروليه بزيادة سعر السولار وأكدت إن أسعار العيش هتفضل زي ما هي
وده اللي أكده الدكتور علي المصيلحي وزير التموين والتجارة الداخلية، وقال إن الدولة ممثلة في الهيئة العامة للسلع التموينية التابعة للوزارة، هتتحمل فارق تكلفة تصنيع رغيف الخبز المنتج بالمخابز البلدية اللي بتشتغل بوقود السولار
مش بس كده ده المصيلحي قال كمان إن المواطن هيشتري الخبز البلدي المدعم من خلال بطاقة التموين بسعر 5 قروش بس، وإن الدولة هتتحمل فرق تكلفة الإنتاج وهتسددها كمان بشكل فوري لأصحاب المخابز من خلال هيئة السلع التموينية
بس السؤال المهم بقا يا ترى إيه هو مصير العيش السياحي أو زي ما بيتقال عليه الحر؟
من كام يوم صرح خالد صبري، سكرتير شعبة المخابز بالغرفة التجارية، لـ موقع القاهرة 24: وقال إن قرار لجنة التسعير التلقائي للمنتجات البترولية برفع أسعار لتر السولار بـ 1 جنيه مش هيأثر على أسعار الخبز سواء المدعم أو حتى السياحي في مصر
سعر العيش السياحي
لكن واضح كده إن في زيادة جاية وإن العيش السياحي سعره هيزيد،وده لأن ا لكلام اللي طلع عبدالله غراب رئيس شعبة المخابز، في برنامج كلمة أخيرة مع الإعلامية لميس الحديدي وقاله متناقض وده لأنه لما لميس الحديدي عن إننا ممكن نلاقي نسبة زيادة 25 و 30 % في أسعار العيش الفترة الجاية رد عليها بالنص «وحياة غلاوتك ما يحصل
لكن في نفس الوقت قال إن أسعار أنواع الخبز التانيه ويقصد هنا السياحي و انواع المخبوزات، هيتم تحريك سعرها بنسبة مقاربة لزيادة سعر السولار، وقال إنها مش هتزيد الـ%15
لكن أكد إن الدولة هتتحمل فارق زيادة أسعار السولار، وإن رغيف العيش المدعم المنصرف علىو بطاقات التموين هيفضل زي ما هو من حيث السعر والوزن.
وده طبعا معناه إننا هنشوف زيادة في أسعار العيش اللي بيتم إنتاجه خارج منظومة الدعم التموينية.
ولما سألته لميس الحديدى عن مقترح إنتاج وبيع العيش الحر من نفس المخابز البلدية بتكلفة 90 قرش للرغيف ووزنه 90 جرام، رد وقال أن الفكرة دي لسه موجودة ولكن الحكومة قررت الانتظار لبعض الوقت وده بسبب دخول شهر رمضان .
وحسب تصريحات عبدالله غراب رئيس شعبة المخابز، فـ مصر فيها 30 ألف مخبر بيشتغل منهم 15 ألف مخبر منهم بالسولار، والباقي بالغاز.
دلوقتي قولنا رأيك في اللي بيحصل وهل أصحاب المخابز عندهم حق لو رفعوا سعر العيش السياحي؟
