أخيرا انخفاض في اسعار الفراخ، على عكس المتوقع وما يحدث في كل عام في شهر مضان والذي اعتدنا فيه ارتفاع في أسعار معظم السلع، فماذا حدث هذا العام وقلب حال السوق.
بشرى سارة من شعبة الدواجن للمصريين أعلنت فيها انخفاض أسعار الفراخ 5 جنيه مرة واحدة، عشان ينزل سعره الكيلو إلى حوالي 75 جنيه للمستهلك.
كمان البيض كان ليه حظ من انخفاض الأسعار، ودلوقتي الكرتونة كاملة سعرها بيبدأ من 100 إلى 110 جنيه.حتى الكتكوت بقى ب13 و14 جنيه بدلا من 18 جنيه، وطبعا انت بتسأل إيه السبب في ده كله؟
عبد العزيز السيد، رئيس الشعبة، قال إن اللى حصل ده نتيجة لتراجع الإقبال على الشراء في الأسبوع اللي قبل بداية رمضان، بس ده يخليك تستغرب اكتر:
تراجع استهلاك في رمضان؟ طب ازاي؟ ده احنا طول عمرنا نعرف ان الاستهلاك بيزيد فيه، حتى الناس كانت تقول لبعضها ده شهر عبادة مش شهر اكل، فياتري ايه اللي حصل؟
عبد العزيز السيد جاوب على السؤال ده وقال إن دخل المواطن المصري دلوقتي ضعيف، عشان كده مش هنلاقي في رمضان السنة دي زيادة في الاستهلاك بنسبة 30% زي السنين اللي فاتت، يعني من الآخر حجم الشراء والبيع هيكون في المستوى الطبيعي.
بس خد بالك ده مش السبب الوحيد في انخفاض الأسعار، لأن الدولة خدت اكتر من خطوة إيجابية لضبط السوق، ومنها الإفراج عن كميات كبيرة من الاعلاف للحفاط على حجم المعروض من الفراخ في السوق ، لأنها سلعة استراتيجية مهمة وخصوصا مع ارتفاع أسعار اللحمة.
في نفس الوقت، حسين أبوصدام نقيب الفلاحين، أكد استقرار أسعار الأعلاف الفترة دي بسبب وفرة المعروض.والخبر الأحلى بقى ان في توقعات بانخفاض أسعارها خلال الفترة الجاية بعد تراجع أسعار فول الصويا العالمية والإفراجات الجمركية.
وبكده يفضل معانا اهم سؤال: الانخفاض في أسعار الفراخ مؤقت ولا هيستمر طول الشهر؟
رئيس الشعبة ماقالش توقع واضح بس الأكيد ان مفيش ارتفاع، يعني احتمال يبقى في ثبات أو انخفاض في الأسعار خلال الفترة الجاية، وطبعا استمرار الافراجات عن الأعلاف هيحصل استقرار أكبر في أسعار الفراخ
وعلى فكرة، انتاج مصر من الدواجن حوالي 1.6 مليار طائر سنويا، وده مخلينا نحقق اكتفاء ذاتي بنسبة 95%.بس مع الأزمة الأخيرة، الحكومة استوردت فراخ مجمدة من البرازيل عشان تبيع الكيلو بسعر 65 جنيه.
ومع اقتراب شهر رمضان، تعاقدت التموين على استيراد شحنة جديدة من الفراخ البرازيلي قيمتها 25 ألف طن، هتوصل مصر على دفعات عشان تغطي احتياجات الشهر الكريم.
انتوا بقى لاحظتوا انخفاض أسعار الفراخ؟ طيب بتشتروا الكيلو دلوقتي بكام؟ وياترى وانتوا بتجهزوا لرمضان اشتريتوا الفراخ البرازيلي ولا برضه فضلتوا تشتروا الفراخ البيضا؟
