تتذكروا شهادة الـ18% من البنك الأهلي وبنك مصر، مواطنين كثير قدموا عليها وهي حققت وقتها للبنوك أكثر من 750 مليار جنيه، وكانت الحل الأفضل للمواطنين لكي يستثمروا فلوسهم بعائد مضمون.
ياترى بقى الناس اللي قدمت على شهادات الـ18% تقدر تكسر الشهادة دلوقتي وتقدم على شهادات الـ25% الجديدة، وهل هيخسر وقتها العميل كتير تعالوا نعرف الإجابة في حلقتنا النهاردة؟
باقي أقل من 90 يوم على معاد استحقاق شهادة الـ18% اللي تم طرحها من البنك الأهلي ومصر في 21 مارس اللي فات وكانت لمدة سنة، وقدر البنكين يجمعوا من تاريخ طرح الشهادة لشهر مايو اللي فات حوالي 750 مليار جنيه، بعدها قرروا يوقفوا التقديم عليها لأنهم وصلوا لهدفهم من طرحها.
وطبعًا كتير من اللي قدموا عليها بيفكروا دلوقتي يكسروا الشهادة دي ويقدموا على شهادة الـ25% الجديدة.
طب ياترى يقدروا امتي يعملوا ده وهل ممكن يخسروا ؟
هقولك ياسيدي، المفروض إن أصحاب شهادة الـ18% اللي اشتروا الشهادة من سنة هياخدوا الأرباح في نهاية شهر مايو المقبل .
وبعد المدة دي هيكونوا قادرين إنهم يفتحوا شهادة تانيه وقتها وده طبعًا عشان يستغلوا مبلغ الشهادة القديمة في اي منتج مصري تاني ويتسثمروه بشكل يخليهم يكسبوا أرباح مرة تانية.
لكن للأسف المتوقع إن أصحاب شهادة الـ18% مش هيلحقوا يقدموا على شهادة الـ25% الجديدة بعد انتهاء مدة استحقاق الشهادة القديمة وده لأنه حسب تصريحات محمد الإتربي، رئيس بنك مصر، اللي قال إن مدة طرح الشهادة الجديدة هيتراوح بس ما بين أسبوع لـ 3 أسابيع تقريبا.
وبحسبة بسيطة محدش فيهم هيلحق ياخد عائد شهادة الـ18% ويفتح بيه شهادة جديدة وده لأنه مش هيقدر يصرف العائد إلا بعد حوالي 90 يوم من دلوقتي، لكن هيقدروا وقتها يقدموا على الشهادات الادخارية الموجودة في البنوك، ومين عارف يمكن يطرحوا شهادة بعائد أعلى!
طيب هل الأفضل إننا نكسر الشهادة القديمة؟
الحقيقة لأ الأفضل إنك متقربش للشهادة القديمة وده لانه حسب نصيحة محمد الإتربي،رئيس بنك مصر بأن كل اللي عنده شهادة إدخار سواء بقى الـ 11 أو 18 % ميكسرهاش عشان ما يتعرضش لخسارة كبيرة، لكن ممكن تستثمروا في الشهادات الجديدة من غير ما تكسروا القديمة.
ما هو أفضل حل؟
لو انت محوش قرشين وحابب تستثمرهم أحب أقولك إن البنك الأهلي المصري ومصر أصدرا شهادتين بـ عائد مرتفع بنسبة 22.5% للشهادة الشهرية و25% كعائد سنوي لمدة عام، بعائد شهري للأولى وسنوي للثانية، وتقدر دلوقتي تقدم عليها في كل فروعهم بالمحافظات.
الجميل بقا إن الشهادات الجديدة “متاحة للعملاء الجدد والقدام، أو لأي عميل انتهت مدة شهاداته اللي قبل كده وحابب يجددها بسعر الفائدة الجديد.
وطبعًا متوقع إن الشهادة الجديدة تقف في اي وقت وده لما تحقق الهدف المطلوب منها، عشان كده بنقولك لازم تلحق تقدم لأنه خلال 3 أيام بس وصل حصيلة الشهادات الجديدة 91 مليار جنيه.
قولنا لو انت من أصحاب شهادات الـ 11 أو 18 % هتعمل إيه؟
