قرار البنك المركزي المصري الذي أصدره خلال الساعات الماضية بتحرير سعر الصرف للجنيه وأنه يعتمد فيه على العرض والطلب، تسبب في حالة من الارتباك في الأسواق المصرية مع ارتفاع سعر الدولار وتخطيه الـ22 جنيه.
لكن التأثير الخاص بالقرار ده مش هيكون على الدولار بس.. لكن هيكون على الأسعار الخاصة بالسلع واللي هتزيد بنسبة كبيرة الفترة الجاية.. لكن اللي الكل بيسأل عليه دلوقتي.. هو الاسعار هتزيد قد إيه؟ وهل الزيادة هتكون على السلع المستوردة بس ولا السلع المحلية كمان؟.. اسئلة كتيرة هنجاوب عليها في التقرير التالي:
على الرغم من أن أغلب الناس كانت متوقعة قرار التعويم بتحرير سعر صرف الجنيه قدام العملات الأجنبية وخاصة الدولار بسبب الأزمات الاقتصادية الكبيرة والأزمة اللي حاصلة في أغلب السلع المستوردة واللي ممنوع استيرادها أو مركونة في الموانئ الفترة اللي فاتت.. إلا أن القرار برضو عمل حالة من الارتباك الكبيرة في الشارع المصري.
ومع صدور القرار أصبح الكل بيسأل ياترى إيه اللي هيحصل في البلد الفترة الجاية بعد قرار التعويم.. خاصة أن الدولار مش راضي يثبت ومستمر في الارتفاع عشان يتخطى دلوقتي الـ22 جنيه ولسه في طريقه للارتفاع أكتر الفترة الجاية.
كل ده خلى الكلام عن أسعار السلع هو حديث الناس.. الكل بيسأل إيه اللي هيحصل في الأسعار الفترة الجاية.
متى بشاي رئيس لجنة التجارة الداخلية بشعبة المستوردين باتحاد الغرف التجارية قال إن بعد قرار البنك المركزي بتحرير سعر الصرف أعلن البنك المركزي عن رفع نسبة الفائدة على الإيداع والإقراض وبالتالي ده هيكون له تأثير مباشر على أسعار السلع.
رئيس لجنة التجارة الداخلية بشعبة المستوردين قال إن الزيادة على السلع المستوردة هتحصل هتحصل مفيهاش خلاف.. لكن هتكون بنسبة كبيرة ربما تصل إلى 30 ً% الفترة الجاية خاصة مع ارتفاع سعر الدولار بشكل كبير واستمرار نزيف الجنيه المصري.
لكنه قال إن السبب في الارتفاع أن مصر بتستورد أكتر من 70% من السلع والمنتجات من الخارج وبعد كده بيتم طرحها في السوق المحلي وبالتالي ده معناه أن أسعار السلع المستوردة هتغلى خاصة في ظل تراع توافر المنتجات محلية الصنع منها.
متى بشاي أكد أن تداعيات القرار هتكون كبيرة جدا على المواطن الفترة الجاية لأن السلع هتدخل في موجة غلاء كبيرة هتأثر على الأسعار بشكل كبير.
هل سترتفع أسعار السلع المحلية؟
رئيس لجنة التجارة الداخلية بشعبة المستوردين قال إن على الرغم من أن المنتجات المحلية غير مرتبطة بالاستيراد إلا أن الأسعار هتغلى برضو لأن المخرجات منها بتكون مستوردة يعني المواد الخام وعملية الإنتاج هتكون مكلفة وبالتالي هتكون فيه زيادة هتتأثر بيها.
لكنه قال إن الزيادة في المنتجات المحلية مش هتكون بنفس القدر اللي هتكون عليه الزيادة في السلع المستوردة اللي هتغلى بنسبة تصل لـ30% وربما تزيد عن كده كمان الفترة الجاية.
