وكالة رويترز العالمية قامت بعمل استطلاع سألت فيه 18 اقتصادي عن مستقبل الاقتصاد المصري خلال الفترة وسألت عن 3 أشياء الجنيه، سعر الفايدة، معدل النمو.
وخلينا نبدأ الجنيه لان اي تغيير فيه علطول بتحس بيه، بس الخبر الحلو ان الاستطلاع توقع تعافب الجنيه من ازمته عشان ينخفض سعر الدولار الى 26.24 جنيه امام الدولار في يونيو الجاي، بس بعدها بسنة وفي يونيو 2024 هيطلع الدولار إلى 28.50 جنيه.
التوقعات دي جاية بعد توقيع مصر لاتفاق مصر مع صندوق النقد بقيمة 3 مليار دولار، مع خطة لتسييل بعض أصول الدولة على مدار 4 سنوات بقيمة 10 مليار دولار سنويا.
وده ياخدنا للتحليلات اللي بتأكد ان الجنيه المصري متسعر بأقل من قيمته أمام الدولار وآخرها صادر عن شركة “كولومبيا ثريدنيدل انفستمنتس” Columbia Threadneedle Investments ، واللي قالت إن الجنيه المصري متسعر بأقل من قيمته بنسبة 25٪.
في الوقت نفسه، توقع رئيس شركة أم باور للاستشارات المالية، أسامة مراد، وصول سعر صرف الجنيه المصري أمام الدولار إلى نقطة اتزان خلال شهرين أو تلاتة، وغالبا هيكون أقل من السعر الحالي، يعني الدولار ممكن ينزل.
لكن ده هياخد وقت ، لأن لسة في طلب على الدولار البنوك مش مغطياه، وأزمة البضائع بالمواني المصرية لسة منتهتش خصوصا ان في طلب جديد على السلع مع اقتراب شهر رمضان.
بص بقى على سعر الدولار دلوقتي هتلاقي مابين ال29 وال30 جنيه، بعدما فقدت العملة المحلية اكتر من 90٪ من قيمتها بداية من مارس 2022 ولغاية دلوقتي.
ده معناه اننا ممكن نشوف ارتفاع جديد في سعر الدولار قبل هبوطه واستقراره عند مستوى معين
أما بقى تاني حاجة اتكلم عنها الاستطلاع وهي سعر الفايدة، فاراء الخبراء الاقتصاديين شايفين إن البنك المركزي هيخفض الفايدة إلى 15%، بدلا من 17.25% حاليا، وده بنهاية يونيو قبل أن يتراجع إلى 9.75% بنهاية يونيو 2026.
والملاحظ هنا ان توقع رويترز عكس نصيحة صندوق النقد الدولي واللي شايف إن البنك المركزي لازم يستمر في تشديد السياسة النقدية يعني رفع الفايدة مع استمرار ارتفاع معدل التضخم.
وهنا لازم نشير إلى اجتماع البنك المركزي المنتظر في 2 فبراير لحسم أسعار الفايدة، والحقيقة ان التوقعات مابين الرفع أو التثبيت لكن التخفيض لسة اختيار مش متاح حاليا حسب الخبرا.
وبالنسبة لمعدل النمو، وتوقع الاقتصاديون نمو الاقتصاد المصري بنسبة 4.8% خلال العام المالي الحالي اللي بينتهي في يونيو 2023.
وده نسبة أكبر من اللي توقعتها الحكومة لكنه لسة أقل من مستهدفات الحكومة على المدى المتوسط.
والسؤال دلوقتي: انتو توقعاتكم إيه؟ هل فعلا الجنيه هيستعيد هيبته أمام الدولار؟ ولا الأخضر ليه رأي تاني؟ سترك
