تتخيلوا ماذا سيحدث إن قررت الحكومة المصرية التراجع عن قرارا تعويم الجنيه؟وهل قرار التعويم اختياري أم أن مصر مضطرة لتنفيذه؟ ، وياترى القرار هذا ممكن يكون في صالحنا أم ضدنا؟ واخيرا : ما هو مستقبل سعر الدولار الفترة القادمة؟
تقرير دولي من مؤسسة جولدمان ساكس ودي مؤسسة مالية دولية قالت إن مصر بتواجه الفترة دي ضغوط صعبة واللي هتخليها تسرع في تنفيذ أجندة الإصلاح الاقتصادي.
واللي مش عارف إيه هي الأجندة دي فـ ده اتفاق بين الحكومة المصرية وبين صندوق النقد واحنا لازم ننفذ الاتفاق ده وده لأنه حسب كلام جولدمان ساكس لو منفذناش هنواجه سيناريو صعب.
وده لأن صندوق النقد الدولي وافق في ديسمبر اللي فات إنه يدي مصر قرض بقيمة 3 مليارات دولار بشرط استمرار الحكومة المصرية في اتباع سعر صرف مرن للجنيه أمام العملات التانيه وإنها كمان تكون ملتزمة بتنفيذ برنامج الطروحات وتخارج الدولة من حصص مملوكة ليها للمستثمرين.
طيب معناه إيه الكلام ده ؟ هقولك يا سيدي الكلام ده معناه إن مصر معندهاش خيارات كتيرة ولازم في أسرع وقت تنفذ تعويم الجنيه ، واللي حسب كلام مؤسسة جولدمان ساكس لو الحكومة المصرية سرعت تنفيذ التعويم هيكون عندنا سيناريو متفائل للاقتصاد المصري، لكن لو منفذتش قرارات التعويم هنقابل سيناريو مش متفائل ومؤشرات النمو الاقتصادي مش هتعجبنا.
ده كمان التقرير كان واضح وصريح وقال إن مصر لو معتمدتش سعر صرف مرن للجنيه ده هيصعب الوضع الاقتصادي
وقال إنه لو مفيش تعويم من الاخر يعني مفيش استثمار أجنبي مباشر، وادى مثال على الكلام ده وقال إنه متوقع لو مصر منفذتش التعويم إن معدل الاستثمار الأجنبي المباشر يسجل 9 مليار دولار في 3 سنين.
لكن في حالة لو مصر تنفيذ قرارات التعويم هيكون معدل الاستثمار الأجنبي المباشر 14 مليار دولار في السنة الواحدة! وطبعا ده فرق كبير جدا.
وده لأن مؤسسة جولدمان ساكس كانت شايفة إنه لو الحكومة المصرية اتخلت عن تنفيذ تعويم الجنيه هتحصل على تمويلات محدودة من الأسواق الدولية واللي هتكون قيمتها 3 مليار دولارسنويا والكلام ده على مدار الـ 3 سنين الجايين .
وده معناه إنها هتقل النص بظبط عن التوقعات اللي قالوها لو احنا نفذنا قرارات التعويم، وعشان كده هما شايفين كمان إن الاحتياطيات من النقد الأجنبي هتقل بشكل كبير لو الحكومة ملتزمتش بشكل كامل بتنفيذ مرونة سعر الصرف وهتكون أقل من 13 مليار في السنة المالية 2025 /2026.
لكن انا مش عايزك تحبط خالص وده لأنه في سيناريو متفائل اكتر اتكلمت عنه مؤسسة جولدمان ساكس المالية
وقالت إن الحكومة لو نفذت قرارات التعويم ده هيدعم التصدير والقدرة التنافسية على المدى الطويل وهيساعد مصر على تعزيز التبادل التجاري.
ده مش بس كده دي كمان المؤسسة شايفة إن مبيعات الأصول هتساهم في زيادة كبيرة جدا من تدفقات الاستثمار الأجنبي المباشر بمتوسط 14 مليار دولار كل سنة على مدى الـ3 سنين الجايين وطبعا الرقم ده اضعاف الأرقام اللي كانت متوقعة لو مفيش تعويم وده هيخلي في زيادة في المعروض من العملات الأجنبية.
دول كمان قالوا إن التعويم هيساعد مصر إنها تاخد تمويلات خارجية بمتوسط 6 مليار دولار كل سنة، والسيناريو ده من وجهة نظر المؤسسة المالية هيسمح لمصر إنها تقلل العجز في الحساب الجاري بالتدريج لحد ما يوصل لـ 2.6% في السنة المالية 2025/2026 بعد ما كان 3.5%.
دلوقتي قولنا وبكل صراحة هل انت شايف إن التعويم لازم يحصل وإنه مصر هتستفاد من قرارات التعويم ؟
