وكالة فيتش العالمية قررت إنها تخفض تصنيف مصر الائتماني لـ B بدل B+ وليس هذا فقط ولكنها أعطت الاقتصاد نظرة مستقبلية سلبية.
طيب ياترى الكلام ده معناه إيه وهل كده الحكومة مش ماشية في طريق صح ؟، وإيه اللي يخلي المؤسسات الدولية قلقانه من الوضع الاقتصادي المصري، وياترى ده معناه إن الجنيه في خطر؟ وإيه رد الحكومة؟
خبراء الاقتصاد والمستثمرين بيستنوا دايما تقارير المؤسسات الدولية زي مؤسسة فيتش وغيرها وده عشان يعرفهم اقتصاد البلد رايح على فين.
بس اللي حصل إن مؤسسة فيتش للتصنيف الائتماني أعلنت إنها خفضت تصنيف مصر الائتماني طويل الأجل لـ “B” بدل من “+B” مع نظرة مستقبلية سلبية.
طيب ياترى ليه ده حصل؟
“فيتش” قالت إن التخفيض ده حصل عشان هي شايفه إن مصر احتمال تواجه صعوبة في سداد الالتزامات اللي عليها طويلة الأجل بالعملة الأجنبية، حسب الشرق بلومبرج.
أما بخصوص نظرتها المستقبلية السلبية فكانت شايفة إن مصر محتاجة تمويلات خارجية مرتفعة لكن في الوقت الحالية ده صعب يحصل.
ولو انتوا فاكرين فـ مؤسسة “ستاندرد أند بورز” للتصنيف الائتماني بردوا عدلت نظرتها المستقبلية لمصر في أبريل اللي فات من مستقرة إلى سلبية .
طيب إيه الأسباب اللي خلت المؤسسات الدولية تعمل كده؟
حسب البيان اللي أصدرته وكالة فيتش فـ كانت شايفه إن تراجع التصنيف الائتماني بسبب حالة الغموض الكبيرة اللي بتواجه أسعار الصرف في مصر، وكمان تراجع احتياطات السيولة الخارجية.
كمان حذرت من تأخير تنفيذ سياسة مرونة أسعار الصرف وقالت إن ده ممكن يأخر تنفيذ برنامج صندوق النقد الدولي.
وقالت إن تأخير قرار التعويم قلل ثقة الأسواق في نظام إدارة سعر الصرف الجديد، وده من وجهة نظرها قلل من دخول الاستثمارات بالدولار للبلاد
“فيتش” لاحظت كمان رجوع أزمة الدولار في فبراير 2023، وإزاي حصل تدهور قيمة الجنيه المصري كذا مرة وده لحد ما انخفض بنسبة 50% تقريباً قدام الدولار وده بالمقارنة مع بداية 2022.
هل يستقر الجنيه الفترة القادمة؟
الحقيقة “فيتش” توقعت إن الجنيه يتراجع أكتر من كدا خلال الفترة الجاية، لكن قالت إنه هيستقر في يونيو 2024.
بس الغريب انه مارس اللي فات توقعت وكالة “فيتش ” ارتفاع الدولار قدام الجنيه وقالت إنه هيوصل لـ 33 جنيه خلال الفترة الجاية، لكن قالت إنه الدولار هيتراجع مرة تانيه لـ 30 جنيه في نهاية 2023، حسب موقع inveting
هل كلام الوكالات الدولية صحيح دائما؟
الحقيقة مش دايما وده لأن رئيس الوزراء في تصريحات ليه قال إن في تقارير كتيرة من المؤسسات الدولية اتكلمت عن الأزمة الاقتصادية العالمية، وخطورة تداعيات الأزمة دي على مصر.
وقال إن في كتير منهم سأل عن قدرة مصر على سداد الالتزامات المالية الدورية اللي عليها، لكن الأكيد إن الدولة المصرية لم ولن تخفق في سداد أي التزامات دولية عليها.
وإن مصر هتنفذ برنامج الطروحات اللي أعلنت عنه قبل نهاية شهر يونيو الجاي واللي بيستهدف جمع 2 مليار دولار.
ومش بس كده رئيس الوزراء اعلن عن قرار هام إنه هيعمل مؤتمر صحفي عالمي خلال الأيام الجاية عشان يرد على كل الاسئلة اللي بتشغل الرأي العام الفترة دي واللي متعلقة باقتصاد مصر وإزاي بتواجه الأزمة الاقتصادية العالية.
قولنا رأيك في خفض التصنيف الائتماني لمصر وإزاي المؤتمر الصحفي اللي أعلنت عنه الحكومة هينجح في الرد على الكلام ده؟
قولنا رأيك قرار خفض التصنيف الإئتماني لمصر وهل شايف إن ده مؤشر خطير؟
