الياميش من الأشياء المهمة والتي من غيرها أجواء رمضان ستكون ناقصة، لكن الاسعار هذا العام جنونية وكل الأصناف سعرها زاد حتى البلح.
يا ترى الأسعار بقت كام؟ وازاي تقدر تشتري كل اللي أنت عايزه بأسعار كويسة؟ وأيه أفضل البدائل من كل نوع؟ تابعونا وهنقول لكم كل التفاصيل.
ارتفاع الأسعار
بالمقارنة بالسنة اللي فاتت.. هتلاقي أسعار الياميش السنة دي ارتفعت بنسبة كبيرة أوي تتراوح ما بين 30 إلى 60% على حسب الصنف اللي هتشتريه.. وطبعا الزيادة دي سببها ارتفاع سعر الدولار.
مجدي توفيق نائب رئيس شعبة العطارة بغرفة القاهرة التجارية.. قال إن مصر بتستورد 100% من ياميش رمضان من تركيا ومن مجموعة دول تانية.
والسبب في ارتفاع أسعار الياميش لمستويات عمرنا ما شوفناها أن الكميات المستوردة قليلة عن السنين اللي فاتت، غير كمان ارتفاع سعر الدولار بشكل كبير.
البندق واللوز
وعن الأسعار بقى.. فسعر كيلو البندق واللوز السنة دي يتراوح ما بين 250 و 260 جنيه.. وسعر كيلو القراصيا وصل 230 جنيه بعد ما كان بـ 140 جنيه بس.
وبالنسبة للمشمشية فسعرها وصل 380 جنيه يعني زادت حوالي 160 جنيه عن السنة اللي فاتت.. وسعر كيلو الزبيب المستورد وصل حوالي 120 جنيه في السوق.
أما أسعار البلح.. على حسب الجودة والنوع.. يعني هتلاقي أنواع بـ 20 جنيه وأنواع تانية بـ 50 جنيه وبيوصل معاك لحد 100 جنيه للكيلو.
حركة البيع بطيئة
رغم أن محلات العطارة بدأت الأيام اللي فاتت تعرض الياميش استعدادا لشهر رمضان.. بس حركة البيع والشراء بطيئة جدا..
وتوقع مجدي توفيق أن محلات العطارة مش هتحقق مبيعات ضخمة زي السنين اللي فاتت لأن أسعار الياميش غالية بشكل كبير جدا.
الحكومة تقدم الحل
الحكومة ممثلة في وزارة التموين قدمت حل للمشكلة.. وبدأت تطرح مختلف أنواع الياميش في فروع المجمعات الاستهلاكية بأسعار أقل شوية من باقي السوق.
وكل أنواع ياميش رمضان عليها خصومات حوالي 20% بالمقارنة بباقي السوق.. وكل ده عشان تلبي احتياجات المواطنين خلال الشهر الكريم.
والمهندس عادل رشدي رئيس شركة النيل للمجمعات الاستهلاكية، قال إن تم توفير كميات ضخمة في المجمعات الاستهلاكية.. والمنتجات المعروضة جزء منها محلي والجزء التاني مستورد من سوريا وأمريكا وأسبانيا وبلغاريا وقبرص وتركيا.
الأسعار في المجمعات
وأسعار قمر الدين في المجمعات بتتراوح ما بين 60 و 70 جنيه.. وفي أنواع تانية أقل شوية بيكون سعرها 45 جنيه..وكيلو البندق الأمريكي بـ 180 جنيه، والبندق التركي بـ 360 جنيه.. والتين التركي بـ220 جنيه.. وجوز الهند النص دسم الكيلو بـ 68 جنيه.
وفي كمان التين الهندي الـ300 جرام بـ 40 جنيه.. أما التين السوري الكيلو بـ 55 جنيه. ووصل سعر كيلو المشمشية التركي لـ 250 جنيه وفي أنواع بتكون اغلى شوية.
الضخ مستمر
المجمعات الاستهلاكية متوفر فيها أنواع كتير جدا من الياميش.. وأسعارها أفضل من السوق.. صحيح مش أفضل كتير.. لكن في خصومات على أنواع كتير.
والمهندس عادل رشدي أكد أن معدلات الضخ في المجمعات الاستهلاكية بتزيد كل يوم مع اقتراب شهر رمضان.
وقال كمان إن تم افتتاح معارض أهلا رمضان داخل المجمعات الاستهلاكية.. ووصل عددها لحد دلوقتي لـ 40 فرع.. وهتوصل مع بداية شهر رمضان لـ 100 فرع.
