الشهور الأخيرة مصر عانت من أزمة نقص العملة التي كانت سبب في أزمات كثيرة ومنها تكدس البضائع في المينا و كانت سبب أساسي في ارتفاع جنوني للأسعار .
الأزمة دي هتنتهي امتى؟ وإيه اللي قاله بنك أمريكي عن الأزمة دي وايه الحل اللي اقترحه؟كل ده واكتر هتعرفوا لما تتابعنا في التقرير التالي:
الأسعار خلال الشهور الأخيرة ارتفعت بشكل كبير جدا ودايما اما تسأل عن سبب الزيادة دي يقولك الدولار ويجي هنا السؤال ايه حكاية ازمة الدولار وهتتحل و لا لا؟
الأزمة دي ممكن نقضي عليها في اسرع وقت لو نفذنا بعض الاجراءات وده الكلام اللي قالو عدد من المصريين.
وبحسب تصريحات محمد عبد العال الخبير المصرفي لمصراوي، قال ان ازمة نقص العملة ممكن تتحل ويتم التخلص منها.
ولما اتسال نعمل ايه عشان نتخلص من الازمة بشكل اسرع؟
رد وقال ان في بعض الخطوات لو اتنفذت هنقضي علي الازمة للابد ومن ضمن الخطوات دي،ان لازم نقلل ديون الدولة و كمان نزود حجم صادراتنا عشان نقدر ندخل عملة للبلد وكمان نقلل حجم استيردانا من الخارج قدر الامكان.
اما بالنسبة للاستثمار اللي هيساهم بشكل كبير في توفير العملة فلازم نحاول اننا نجذب مستثمرين اجانب و نشجع المستثمرين في مصر،طيب هنشجعهم ازاي؟
ده بقى لو وفرنا المناخ المناسب للاستثمار وقضينا على الفساد و العواقب اللي بتواجهم والضرايب اللي بتتاخد من غير اي مزايا بتتقدم ليهم، وكمل كلامه وقال اننا لازم ندعم الاستثمارات اللي بين الحكومة و بين القطاع الخاص.
سهر الدماطي نائب رئيس بنك مصر السابق اتفقت معاه وقالت بحسب تصريحاتها لمصراوي ان بداية حل الأزمة هو تقليل ديون مصر خصوصا بعد زيادة الفايدة
وقالت كمان اننا مش لازم نتعامل بالدولار ونخفف الضغط عليه ونعتمد على عملات تانيه مع دول زي الصين والهند وروسيا
وقالت ان السياحة و الصادرات من اهم الموارد اللي بنعتمد عليها في توفير العملة الصعبة عشان كده لازم ندعمهم ونقملهم حوافز لتشجعيهم
وعلقت سهر الدماطي على برنامج الطروحات الحكومية وقالت ان ده احسن حل عشان نخرج من الازمة بسرعة، وان الحكومة لازم تنفذه في اسرع وقت عشان ده اللي هيجذب المستثمرين الأجانب في مصر وهيدخل العملة الصعبة.
أزمة نقص الدولار في مصر كان ليها صدى في دول كتير عربية واجنبية، وده اللي خلى بنك مورجان ستانلي أكبر بنوك أمريكا قال في تقرير ليه عن مصر بعنوان المطرقة و السندان، ان ازمة نقص الدولار في مصر مش هيتم من قرض من صندوق النقد الدولي بس، وقال ان تطبيق سعر صرف مرن واللي بدأ في 2022هيساهم في تقليل حساب العجز الجاري
ما هو العجز الجاري؟
العجز الجاري ده خلل في صادرات و واردات الدولة اللي لو كانت اقل من النسبة المطلوبة في فترة معينة هنا هيحصل العجز الجاري.لكن يجي السؤال هنا ازمة نقص العملة بدأت ازاي؟
بحسب اللي قاله محمد معيط وزير المالية ان اهم اسباب نقص العملة في مصر هو الحرب بين روسيا و اوكرانيا اللي اثرت بشكل كبير على الأقتصاد المصري، وده خلى استثمارات اجنبية بقيمة 22 مليار دولار تخرج من مصر خلال 2022
ودلوقتي قولنا ازمة الدولار اثرت عليك ازاي؟
