كل من يحلم أن يشتري عربية حلمه سيتحقق خلاص وهذا لأن في 3 قرارات حكومية سيغيروا خريطة سوق السيارات في مصر و الاسعار ستنزل في التوقيت هذا..
الناس مبتبطلش تسأل عن سوق العربيات في مصر وده لأن العربية بصراحة في أوقات كتيرة بتكون أساسية لكل بيت خصوصًا لو في أولاد هتودي نادي هتجيب من المدرسة وهكذا
ولو انت من الناس دي بتسأل نفسك ياترى اشترى دلوقتى ولا بعدين وايه انسب وقت للشراء فـ أحب أقولك إن في 3 قرارات أخدتهم الحكومة هيأثروا بشكل مباشر على سوق السيارات الفترة الجاية
وأول قرار فيهم هو انضمام مصر لـ البريكس وده اعتباراً من 1 يناير 2024، ومعاها الأرجنتين والسعودية والإمارات واللي هينضموا عشان يكونوا جزء من المجموعة اللي بتضم البرازيل وروسيا والهند والصين وجنوب أفريقيا .
طيب يا ترى إيه علاقة ده بالعربيات؟
أقولك ياسيدي المستشار أسامة أبو المجد رئيس رابطة تجار السيارات أكد إن إنضمام مصر لـ البريكس هيأثر بشكل مباشر على الأسعار ومش بس السيارات لأ ده في حاجات تانيه كتيرة
وإن مصر بعد انضمامها لـ البريكس هتقدر تستورد من الصين بالجنيه المصري وخلي بالكم إن مصر من أكبر الدول اللي بتستورد من الصين على مستوى العالم وده طبعا مكسب كبير لـ الدولة المصرية وكمان عندك الهند و روسيا .
واتفق معاه عمرو سليمان، رئيس مجلس إدارة شركة الأمل لتصنيع وتجميع السيارات وكلاء العلامات التجارية بى واى دي الصينية، لادا الروسية، وميكروباص كينج لونج، لما قال إنه في حالة تطبيق الاتفاقية والتعامل بالعملة المحلية في استيراد السيارات الكاملة ومكونات السيارات من دول الأعضاء زي الصين وروسيا هتنخفض أسعار السيارات بشرط توافر كميات كبيرة منها.
ونيجي بقا لتاني وأهم قرار اخدته الدولة المصرية وهو قرار مجلس الوزراء إعادة فتح مبادرة استيراد السيارات للمصريين بالخارج
واللي أكد خبراء إن المبادرة دي تؤدى إلى توفير المعروض من السيارات بعد تراجع الاستيراد للسوق المحلى غير كمان إنها هتساهم فى خفض الأسعار.
وده اللي أكده أحمد الغراب، مدير مبيعات شركة «بى أوتو» لتجارة السيارات، عضو رابطة تجار السيارات، وقال إن التيسيرات الجديدة هتساهم فى زيادة المعروض من السيارات بنسبة توصل لـ 25%، مقارنة بالوضع الحالى
خاصة وإن السوق بيشهد تراجع ملحوظ في حجم المعروض من السيارات.
وقال في تصريحات صحفية إن دخول سيارات المغتربين هيساعد فى تحريك السوق واللي اتصاب بحالة من الركود خلال الفترة اللي فاتت أما بقى آخر قرار أو توجه عملته الحكومة واللي هيساعد في تنشيط السوق وتراجع الأسعار فـ هو الاتجاه بشكل كبير للتصنيع المحلي.
وده اللي أكده اللواء مهندس حسين مصطفى، المدير التنفيذى لرابطة مصنعى السيارات سابقا، وخبير سيارات واتكلم عن خطة الدولة لدعم التصنيع المحلي في قطاع السيارات، وقال إن الحكومة بتحاول تجذب مزيد من الاستثمارات، وإن قانون الاستثمار بيشجع على ده
وفي تصريحات إعلامية قال الدولة أنشأت المجلس الأعلى لصناعة السيارات عشان تحل مشاكل قطاع السيارات، وإن الدولة بتاخد كل القرارات اللازمة عشان تشجع التصنيع المحلي.
كمان وقعت 3 اتفاقات إطارية مع 3 شركات كبرى شغالة في مصر، لتصنيع السيارات محليًا، لزيادة عدد السيارات التي هتطرح في السوق المصرية بحوالي 70 ألف سيارة في العام.
وتوقع انخفاض أسعار السيارات مع بدء دخول الإنتاج الجديد في السوق المحلية.ولو بتسأل إمتى المواطن يبدأ يحس بتأثير انضمام مصر للبريكس على الأسعار؟
الخبير حسين مصطفى جاوب على السؤال ده وقال إن شعور المواطن داخل السوق المحلى المصرى بتأثير انضمام مصر لمجموعة البريكس مش هيحصل بسرعة، وهيبدأ فى النص التانى من عام 2024.
انتوا بقا قولولنا رأيكم وهل فعلا الدولة عملت اللي عليها؟
