أخيرا الحكومة حسمت موقفها ووافقت رسميا على اعفاء واردات ال1هب للمصريين في الخارج من الجمارك. ولكن مع الإعلان عن هذا القرار بدأ المصريين يسألوا عن مدرة القرار وتأثير ذلك على سعر الذهب في مصر وغير، تابعونا لمعرفة كافة التفاصيل:
من كام يوم اعلنت وزاره التموين انها قدمت مقترح للحكومه بتطلب فيه اعفاء دهب المصريين في الخارج من الجمارك، وفعلا الحكومة أعلنت الموافقة فلو بتفكر تستفيد من المبادرة لازم تخلي بالك من 4 شروط
1: الإعفاء هيطبق على الأشكال نصف المشغولة، والمُعدة للتداول النقدي والحُلي والمجوهرات وأجزائها من معادن ثمينة.
2. الاعفاء ده مش متاح على أصناف اللؤلؤ الطبيعي، أو المزروع، أو الأحجار الكريمة، أو شبه الكريمة المركبة، أو المُرصعة على الحلي والمجوهرات وأجزائها.
3. مدة الإعفاء 6 شهور بس
4. الاعفاء هيكون على الضريبة الجمركية والرسوم التانية، بس ضريبه القيمة المضافة موجودة وهتدفعها.
ودلوقتي بقى نيجي لسؤال مهم: إيه تأثير تنفيذ المبادرة على اسعار الدهب جوه مصر؟
ناجي فرج مستشار وزير التموين لشؤون الدهب متفائل وشايف ان القرار ده هيساعد على استقرار، السوق والاسعار وكمان هيرفع الحصيله الدولاريه،ده حتي السوق استجاب بدري بمجرد الإعلان عن قرب تفعيل القرار، وسعره نزل 100 جنيه.
وخد بالك سعر الجرام في مصر اغلى من سعره في السعوديه بحوالي 700 جنيه، حسب كلامه في برنامج كلمه اخيرة مع لميس الحديدي.
وده ياخدنا للسؤال التاني: هل في أي أفكار جديدة هتتنفذ الفترة الجاية لضبط اسعار الدهب، ولا ده آخر قرار؟
في الحقيقه في اكتر من فكرة زي تخفيض سعر المصنعيه على المشغولات الذهبيه، وفي المقابل فرض رسوم زيادة على السبائك والجنيهات، طيب ليه؟
عادة سعر المصنعية على السبايك والجنيهات بيبقى اقل من السعر الموجود على المشغولات الذهبيه، وده اللي شجع المصريين الفتره اللي فاتت على شراء السبايك لدرجة انها بقت ناقصة جدا في السوق، وفي المقابل المشغولات الذهبية مركونة عند التجار والمصانع والورش هي الخسرانة.
عشان كده شعبه الدهب، عندها أمل لو القرارات دي اتنفذت الناس تبدأ تشتري المشغولات الذهبيه وده برده هيساعد على حل الأزمة.
وفوق ده كله في طلب للحكومة من سعيد امبابي رئيس شركه آي صاغة لتداول ذهب والمجوهرات على الانترنت، طلب فيه الاعلان عن بيانات وحجم تداول الدهب في مصر بحيث نعرف ارتفاع السعر اللي بنشوفه دلوقتي مناسب لزيادة الطلب زي ما التجار بيقولوا ولا في تلاعب في السوق..
وفي نفس الوقت، الدولة بدأت تاخد اجراءات والبورصة اعلنت انها هتنزل سعر الدهب على شاشات البورصة خلال الفتره اللي جاية
ودلوقتي قولوا لنا بقى لو انتم شغالين بره مصر هتفكروا جديا انكم تشتروا دهب وتنزلوا بيه عشان تستفيدوا من المبادرة؟
اما بقى لو انتم موجودين جوه مصر. فقولوا لنا رايكم: هل الاعفاء الجمركي على دهب المصريين في الخارج هينزل اسعار الدهب في السوق المحلى؟
