هل جنون الدهب انتهى في مصر؟قرار جديد من الحكومة بإعفاء ذهب المصريين في الخارج من الجمارك،لكن فيه شروط لتنفيذ المبادرة، فهل المدة مفتوحة أم لا لها وقت محدد؟ هتعدي من المطارات والمواني بدون رسوم؟ وما سر الـ11 جنيه؟
الحكومة وافقت على إعفاء واردات الدهب اللي هيدخل مصر مع القادمين من الخارج بس تنفيذ المبادرة ليه 4 شروط:
1.الإعفاء هيطبق على الأشكال نصف المشغولة، والسبايك والجنيهات الدهب.
2. الاعفاء ده مش متاح على أصناف اللؤلؤ الطبيعي، أو المزروع، أو الأحجار الكريمة، أو شبه الكريمة المركبة، أو المُرصعة على الحلي والمجوهرات وأجزائها.
3. مدة الإعفاء 6 شهور بس
4. الاعفاء هيكون على الضريبة الجمركية والرسوم التانية، بس ضريبة القيمة المضافة موجودة وهتدفعها زي ماقلنا في أول التقرير.
كمية االذهب المسموح إدخالها لمصر بدون جمارك
المقترحات السابقه كانت بتتكلم عن وزن ما بين 100 الى 150 جرام لكن الحكومة حسمت الموقف، وقالت لكل مصري عايش برة ونازل إجازة هات اللي انت عاوزه من مشغولات ذهبيه او سبايك او جنيهات دهب، وهتاخد اعفاء جمركي، يعني السقف مفتوح تجيب الكميه اللي انت تحبها.
طريقة حساب ضريبة القيمة المضافة
الخبر الحلو ان القيمة المضافة مش هتتحسب على مشتريات الدهب من الجنيهات الذهبية والسبائك للعائدين من الخارج. لكن هتتحسب بس على فقط على المشغولات الذهبية، تتراوح قيمتها مابين من ٦ إلى ١١ جنيه للجرام.
تأثير مبادرة الدهب على الأسعار في مصر
المفروض إن السبب ورا جنون أسعار الدهب في مصر لأعلى من السعر العالمي هو نقص المعروض في السوق، عشان كده الإعفاء الجمركي في المبادرة الجديذة هدفه يشجع المصريين في الخارج انهم ينزلوا بالدهب لمصر، وبكده يزيد المعروض في السوق وتخف الأزمة.
وخصوصا بقى ان في مقترحات تانية زي تخفيض سعر المصنعية على جرام الدهب، وفي نفس الوقت فرض رسوم زيادة على السبايك والجنيهات.
وده المفروض يشجع الناس برضه انها تشتري مشغولات ذهبية، لأن الكل دلوقتي تركيزه على السبايك والجنيهات عشان كده سعرها ضرب في السما، وفي المقابل المشغولات الذهبية مركونة عند التجار.
ده غير كمان انه هيتم اعلان اسعار الذهب على شاشات البورصه المصرية، والمهم ان توقعات الحكومة دلوقتي بتتكلم عن هبوط سعر الدهب مابين 200 إلى 300 جنيه في الجرام الواحد، وخلال وقت قريب جدا قيمة الدهب في مصر هتوصل للسعر العادل عشان يبقى زي سعره في الامارت والسعودية، بعد ماكان وصل الفرق إلى 700 جنيه في الجمارك.
وخصوصا يعني ان الحكومه اعلنت عن المبادره في وقت يعتبر موسم للمصريين اللي بره وهينزلوا الفترة الجاية عشان يقضوا الاجازات هنا في مصر مع اهاليهم.
