الفترة الأخيرة ظهر كثير من الجدل بخصوص سعر الفائدة، وهذا كان قبل اجتماع لجنة السياسة النقدية يوم الخميس، لكن البنك المركزي خرج وحسم كل الجدل الذي كان يقال.
بس السؤال هنا: ليه البنك المركزي ثبت الفايدة؟ وياترا خبراء الاقتصاد قالوا ايه عن أسعار الفايدة الفترة الجاية؟
كل ده وأكتر هتعرفه بس تابعنا في التقرير التالي:
لجنة السياسة النقدية في البنك المركزي اجتمعت لتحديد مصير سعر الفايدة الفترة الجاية، وقبلها وكانت كل التوقعات بتقول إن المركزي مش هيرفع سعر الفايدة وهيقرر تثبيتها بسبب عوامل كتير اوي
وبالفعل المركزي قرر تثبيت سعر الفايدة للمرة التانية على التوالي، على الإيداع والإقراض لليلة واحدة عند 18.25% و 19.25% و18.75% على الترتيب
وده اللي توقعه معظم خبراء الاقتصاد قبل اجتماع البنك المركزي، ومنهم هاني حافظ الخبير الاقتصادي وقال لموقع القاهرة 24، إن المركزي المصري هيثبت سعر الفايدة وسعر صرف الجنيه
وقال إن ثبات سعر الصرف في الوقت الحالي يعتبر واحد من أدوات السياسة النقدية الحالية لمواجهة معدلات التضخم
ده كمان الخبير المصرفي عز الدين حسانين، قال لموقع القاهرة 24، إن البنك المركزي من الضروري أنه يثبت سعر الفايدة في الوقت الحالي للمرة التانية على التوالي، وده بالتزامن مع قرار البنك الفيدرالي الأمريكي بتثبيت سعر الفايدة في اجتماعه الأخير من أيام
وفي نفس الوقت، شركة اتش سي للأوراق المالية، قالت إن تثبيت الفايدة هو القرار المناسب للبنك المركزي ، لأن الدولة مش عاوزة تزود تكاليف الاقتراض على الشركات، اللي بتعاني اصلا من ارتفاع تكلفة الإنتاج وضعف الطلب.وضيف على كده كمان، احتياج الحكومة للسيطرة على تكلفة خدمة الدين المحلي.
وبحسب تصريحات مصطفى بدرة، الخبير الاقتصادي خلال برنامج يحدث في مصر، المؤشرات العالمية بتشير لتراجع معدل التضخم، بالإضافة لزيادة إيرادات قناة السويس لـ 9مليار و 400مليون جنيه وده معناه زيادة موارد الدولة من العملة الأجنبية اللي بتساند سعر الصرف و بتقلل من التضخم، كل المؤشرات دي سبب أن المركزي يثبت سعر الفايدة
وبحسب محمد أبو باشا، رئيس قسم أبحاث الاقتصاد الكلي في المجموعة المالية هيرمس، إن رغم ارتفاع معدلات التضخم الشهر اللي فات، إلا أن البنك المركزي هيثبت سعر الفايدة من غير أي تغيير
بس السؤال هنا: هو البنك المركزي رفع أسعار الفايدة قد إيه من بداية 2023؟
بص ياسيدي، بحسب موقع المصري اليوم، اللي استعرض من خلال تقرير نشره رحلة سعر الفايدة خلال عام 2023، قال إن في أول اجتماع للبنك المركزي واللي كان يوم 2 فبراير الماضي، وقتها كان قرر تثبيت سعر الفايدة عند مستوي 16.25% و 17.25%
أما بقي في اجتماعه التاني يوم 30 مارس اللي فات كان قرر ساعتها رفع سعر الفايدة 2% وساعتها وصلت لـ 18.25% و 19.25%
وفي اجتماعه يوم 18 مايو الماضي هنا بقى قرر أنه يثبت سعر الفايدة عند 18.25% و19.25%، وخلال اجتماعه اللي تم انعقاده في الساعات الأخيرة قرر أنه يثبت سعر الفايدة للمرة التانية على التوالي.
بس ياترى إيه اللي هيحصل في الاجتماعات الجاية؟حسب كارلا سليم، من بنك ستاندرد تشارترد، من المرجح تأجيل أي تعديلات على أسعار الصرف وسعر الفايدة إلى ما بعد بيع مزيد من الأصول الكبيرة.
ودلوقتي قولنا إيه توقعاتك لسعر الفايدة في اجتماع البنك المركزي الجاي؟
