تحلم باستثمار آمن بعائد مضمون اكن خائف تربط فلوسك في شهادة ادخار، وفجأة تجد البنوك تطرح شهادات جديدة بفائدة أعلى من التي معك؟
وحتى لو اخترت احسن شهادة بس اتزنقت في فلوس بعد كده هتتصرف ازاي؟ مش معقول هتكسر الشهادة؟وعشان تطلع من المطب ده من غير ما تفكر كتير ، كمل معانا الفيديو هتعرف إيه أفضل 5 حسابات توفير تديك عائد يومي وتبقى ضربت عصفورين بحجر واحد.
صحيح شهادات الادخار تعتبر صاحبة أعلى عائد في المنتجات البنكية بس كلنا عارفين انك ما تقدرش تكسر شهادة الادخار قبل مرور 6 شهور على تاريخ الشراء.
وحتى لو كسرتها قبل انتهاء مدتها هتكون بتعرض نفسك لخسارة كبيرة ممكن توصل ل 70% من الفوايد.
عشان كده حسابات التوفير بتكون حل مناسب لناس كتير عاوزين يحوشوا فلوسهم وياخدوا عائد عليها، بس في نفس الوقت تبقى تحت ايديهم في اي وقت أو ظرف طارئ.
والخبر الحلو بقى ان البنوك رفعت الفايدة على حسابات التوفير بعائد يومي، عشان تحافظ على العملا بتوعها، خصوصا ان في منافسة شديدة لطرح شهادات ادخار بعائد مرتفع.
وخلينا نبدأ بحساب التوفير بعائد يومي في البنك الأهلي الكويتي، الفايدة عليه بتوصل إلى 14.5% حسب رصيدك, والحد الأدنى لفتح الحساب 5 آلاف جنيه، لكن احتساب العائد اليومي بيبدأ من 50 ألف جنيه.
كمان بيقدم بنك مصر عائد يومي يتراوح بين 8 و10% على حساب التوفير الجاري، بحد أدنى 50 ألف جنيه لفتح الحساب واحتساب العائد اليومي.
أما البنك التجاري الدولي، فده بيقدم عائد يومي يتراوح بين 6 و9% على المبالغ من 100 ألف جنيه.وفي البنك الأهلي المتحد، بيوصل عائد حساب التوفير لـ8%، على المبالغ من 100 ألف جنيه برضه.
واخر بنك معانا هو مصرف ابو ظبي الإسلامي اللي بيوفر عائد ما بين 4.25% إلى 7.25% على حساب التوفير اليومي بحد أدنى لفتح حساب التوفير واحتساب العائد 100 ألف جنيه.
وكان البنك المركزي المصري، رفع سعر الفايده بنسبة كبيره في 2022 وصلت الى 8%، ومع زيادة معدل التضخم، توقع الخبرا استمرار المركزي في رفع الفايدة في 2023 كمان.
بس في أول اجتماع ليه السنة دي، المركزي فاجئ الكل بتثبيت سعر الفايدة على الإيداع والإقراض عشان تسجل لـ16.25% و17.25% على الترتيب.
وصحيح معدل التضخم ارتفع إلى 31.2% في شهر يناير اللي فات، وده أعلى مستوى ليه في 5 سنوات، بس حاليا الخبراء منقسمين
منهم اللي شايف ان البنك المركزي مضطر لرفع سعر الفائده عشان يواجه التضخم.ومنهم اللي شايف ان رفع الفايده قبل كده في 2022 منزلش معدل التضخم، عشان كده الرفع الزياده مش هيجيب نتيجة، بالعكس ده ممكن يدخلنا في حالة ركود ويزود تكلفة الإنتاج.
انتوا بقي رايكم إيه؟ وهل شهادات الادخار ولا حسابات التوفير افضل بالنسبه ليكم؟
