انتشرت العديد من الشروط الجديدة عن مبادرة الإعفاء الجمركي لسيارات المصريين بالخارج، والبعض ينشر الكلام وعكسه، فهل فعلا الحكومة تريد جمع 10 مليار دولار من المبادرة؟ وهل سيمكنك أن تبيع عربيتك بعد نزولها مصر؟تابع معنا سنوضح 7 بنود في المبادرة سنجازب من خلالهم على اهم الأسئلة التي تشغل بال كثير من المصريين.
خلال الساعات اللي فاتت ، انتشر كلام بأن الحكومة ناوية تجمع 10 مليار دولار من مبادرة الاعفاء الجمركي على سيارات المصريين في الخارج، لكن وزير المالية محمد معيط، نفى الكلام دا، وقال: الحكاية كلها ان واحدة قالتلي في مؤتمر القرار دا ممكن يجيب 10 مليار دولار، قولتلها قولي يارب.
في نفس الوقت اتكلم الوزير عن شروط المبادرة، خصوصا مع الجدل الكبير حوالين طريقة تنفيذها، عشان كده خلونا نشوف مع بعض اهم 7 شروط في المبادرة
اولا الإعفاء من حق أي مصري مقيم بالخارج أو شخص من أفراد أسرته عدى ال16 سنة، ومن غير اشتراط مدة زمنية محددة لفترة وجوده بالخارج، يعني لو في أسرة مكونة من 6 أفراد ومعاها إقامة سارية في الخارج فمن حقها إنزال 6 سيارات معفاة ولمرة واحدة بس.
ثانيا: المستفيد من المبادرة هيدفع قيمة الرسوم والجمارك كاملة بما فيها ضريبة القيمة المضافة وضريبة الجدول، لكن السداد هيكون في شكل وديعة بالعملة الأجنبية، هتتحول من برة لصالح وزارة المالية على حساب بنكي.
وعشان تاخد بالك، الوديعة هتفضل محجوزة لمدة 5 سنين، من غير الحصول على أي عائد وبعد انتهاء المدة، تقدر تسترد فلوسك من الحكومة، لكن بالجنيه المصري على اساس سعر الصرف وقت الاسترداد، كمان وزارة المالية وبعد إقرار القانون هتزل جدول فيه قيم المبالغ النقدية ونوع العملة الأجنبية وأنواع وفئات السيارات وصنعها.
وثالثا، لازم المصري المقيم بالخارج وعاوز ينزل عربيته يحول المبلغ النقدي خلال مدة ماتعديش 4 شهور من تاريخ تسجيل بياناته وبيانات السيارة المطلوب استيرادها، وفي المقابل هياخد موافقة تثبت تمام السداد وبيانات السيارة.
وبالنسبة للشرط الرابع، فلازم اللي هيجيب العربية باسمه يكون ليه حساب بنكي في الخارج مر عليه 3 شهور على الاقل.
والشرط الخامس مرتبط بموديل العربية نفسها، يعني لو المصري المقيم بالخارج هو أول مالك ليها يبقى لازم العربية تكون موديل السنة.
أما لو مكنش المشتري الأول، فلازم عمر العربية، مايقلش عن 3 أعوام من سنة الصنع، يعني تكون موديل 2020 بحد اقصى.
والشرط السادس هو إنهاء إجراءات الشحن والنقل في خلال سنة من سداد الوديعة لإعطاء الفرصة للانتهاء من كل الإجراءات المطلوبة.
ولو فات المعاد، ساعتها من حقك تسترد وديعتك بنفس العملة الأجنبية اللي دفعت بيها مش بالجنيه المصري، وبرضه من غير أي فوايد.
والشرط السابع والأخير بيجاوب على سؤال مهم، هل من حقك تبيع العربية لو نزلتها مصر؟ الإجابة ايوة، الحكومة اكدت إن مافيش حظر بيع على عربيات المصريين في الخارج، وتقدر تبيعها تاني يوم دخولها لمصر وإنهاء كافة الإجراءات.
انتوا كمان لو عندكم اي أسئلة بخصوص المبادرة اكتبوها في التعليقات، وهل شايفين المبادرة هتنجح ولا لأ؟
