تفاصيل صادمة وفيديو من الفرح يكشف مفجأة في واقعة عروس طنطا

فيديو فرح عروس طنطا كشف جزء من اللغز، ستجدون فيه تفاصيل كثيرة وحركات فعلها العريس مع عروسته تكشف عن نيته الغدر بها، هي وأخيها الكبير.

ايه اللى عمله العريس فى الفرح وشكك الناس فيه ؟ .. وازاى كان عايز يدبس أخوها فى الجريمة ؟.. كل ده وأكتر هنعرفه مع بعض فى التالي:

ناس كتير منكم أكيد شافت فيديو فرح عروسه طنطا آيه الشبينى، بس مش كلكم دققتو وركزتوا فى اللى العريس عمله وقت الفرح ويمكن بين جزء طباع العريس ومعاملته معاها، بعض الناس من اللى شافوا الفيديو أخدوا بالهم أن العروسة كانت بتحاول بكل الطرق أنها تضم العريس ليها وقت التقاط الصور، بس هوا كان بيبعد عنها ومش بيقرب قوى، وعلى حسب كلام الناس على السوشيال ميديا ده لغز، ليه كان بيعمل كده؟ .. اللى يعرف فيكم يكتب فى التعليقات.

ونروح دلوقتى للجزئية اللى اتكلم عنها موقع صدى البلد لما كشف أن الزوج كان عايز يدبس أخو العروسة فى الجريمة، العريس وقت ما عمل عملته دى قعد محتار يعمل ايه عشان يدارى الجريمة دى عنه أو يبعد على الأقل الشبه عنه، وخطرت في باله فكرة أنه يتصل بأخوها ويقوله أن فيه مشكله بينهم ويجى هوا يصلح بينهم وبالفعل أخوها راحلها البيت تالت يوم الفرح، ولما راح قابلة العريس على السلم وقاله يطلع لأخته فوق لوحده ويحاول يصلح بينهم، ولما طلع أكتشف انه اخته مرمية على الأرض وجسمها كله متبهدل من اللى عمله فيها زوجها وخلص عليها.

وأتارى ان اللى عمله الزوج ده وطلبه لأخوها أنه يجيلها البيت كان عشان الزوج يدبس اخوها فى الجريمة ويقول أنه اللى عملها يعنى، وده على حسب كلام ابن خالها لموقع صدى البلد، فكره جهنمية بصحيح بس ستر ربنا ماتمتش لأن العريس اول مانفذ جريمته أصلا كان مرعوب وفضل يهرتل بالكلام بصوت عالى على السلم والجيران سمعوه، وسمعوا كل حاجة بيقولها، وتم التأكيد أنه هو اللى عمل الجريمة البشعة دى وتم القبض عليه وحاليا واخد 15 يوم على ذمة التحقيقات اللى هتطلع وتبين كل كواليس الجريمة.

ويمكن بعد التحقيقات نعرف ليه العريس عمل كده فى عروسته، وهل زى ما قالت أسرته أنه عشان افتكر البنت مش بنت بنوت مع أن أهلها نكروا الكلام ده، ولا عشان العريس ماكانش عارف يدخل عليها فعلا زى ما أهلها ما بيقولوا وهو وخاف انها تتكلم عليه وتفضحه وسط أهله وأهلها ولا إيه الحكاية بالضبط ؟ .. بعد التحقيقات كل الحقيقة هتبان، المهم دلوقتى ربنا يرحم البنت ويصبر أهلها على اللى هما فيه، وفي النهاية وقبل مانقفل الفيديو لو حد فيكم يعرف تفاصيل اكتر عن الجريمة البشعه دى يكتب فى التعليقات، اي تفصيله حتى لو صغيره اكيد هتفيد فى الوقت ده.