أزمة كبيرة تسبب فيها مواطن مصرى فى الكويت، وكل هذا بسبب طمعه وغباءه، استولى على شقة في منطقة الجليب بطريقة غريبة بدون علم صاحبها الكويتى وما فعله بها كان عجيب!!
ازاي استولى المصري على شقه كويتي بدون مايعرف ؟ وتأثير ده إيه على العمالة المصرية هناك؟ .. كل ده واكتر هنعرفه مع بعض في التقرير التالي:
كل ما الأمور تستقر وتهدا شويه، تطلع حاجة جديدة تبوظ الدنيا على العماله المصريه فى الكويت، يعني مش كفايه صفاء الهاشمي والنواب الكويتيين اللى مش عايزين عمالة مصرية هناك خالص، يجي الدور على واحد مصري يعمل حركه بكل غباء ممكن تؤثر على العمالة المصرية كلها اللى هناك.
أول امبارح تقريباً أعلنت السلطات الكويتية القبض على شخص مصري مقيم في منطقة الجليب الكويتيه، المصرى ده عمل حاجة علم بيها على كل الكويته وحرفيا خلت فيها حساسيه شويه بينهم وبين العماله المصريه.
المصري ده استولى على شقه غير مسكونة في منطقة الجليب مملوكة لمواطن كويتي، وفضل قاعد فيها لشهور والاكتر من كده انه أجر كام غرفه من الشقه دى لمصرين وعمال تانين، كل واحد باليوم، يعني لو انت فى الكويت ومش لاقي مكان تسكن فيه، كنت تروح لأخينا المصري ده وهو يدبر لك غرفه في الشقه، وكأنها بتاعته يعني، ويحاسبك عليها بالدينار كمان، شوفتوا البجاحه.
الواقعة بالضبط وزي ما بتحكيها إدارة التفتيش الكويتيه، المنزل اللى عليه المشكله، كان مؤجر فى الأصل لشركة ما، عشان تسكن فيها عمالها وانتهى العقد معاهم قبل 3 أشهر، وبالصدفة المواطن الكويتي كان رايح يشوف شقته ويطمن عليها تفاجئ بأن باب الشقة الرئيسي مفتوح، ولما دخل لجوه شويه شاف واحد غريب في احدى الغرف، ولما سأله انت مين؟، قاله انا مصرى مأجر الغرفه دي من واحد مصرى تانى، وهنا عرف الكويتى أن اتنصب عليه وكان فيه واحد مصري بيأجر الشقه باليوم.
الغريب بقى والمضحك فى نفس الوقت، الكويتى لما دخل الشقه لقاها مفروشه بالكامل من مجاميعه يعني، وهوا اللى كان سايبها على السيراميك، يعني الشخص المصرى فرش الشقه وظبطها عشان يعرف يأ جرها لغيره، شفتم تظبيط الشغل.
السؤال هنا دلوقتى هى الحركه دي من الشخص المصرى غير المسؤول ده هتأثر على باقى العمالة المصرية هناك ولا هيكون إيه وضعهم، الحقيقه واللي باين من كلام الكويتيين على السوشيال ميديا فا الموضوع فيه رأيين.
الأول أن العلاقة فعلا هتتاثر، وربنا يسترها بقى، ودلوقتي كل واحد من الكويتيين هيفكر ألف مرة من أنه يشغل واحد مصرى معاه أو أنه يؤجر ليه سكن، ما هما شافوا مثال سبئ.
الرأى التانى أن العلاقة لا ها تتاثر ولا حاجة، عدد كبير من الكويتيين شافوا أن اللى حصل ده ممكن يحصل من أى حد، والشخص المصرى اللى نصب على الكويتي في الشقه لا يمثل إلا نفسه فقط، باقى العمالة المصرية هناك مالهاش ذنب وما ينفعش يتحطوا فى كفه واحده من الشخص اللى استولى على الشقه.
لحد هنا ونكون وصلنا لنهاية الفيديو، وقبل ما نقفل أنتم إيه رأيكم فى اللى عمله المصرى ده ؟ .. وياريت لو تكتبوا في التعليقات توضحوا أنه مش كل المصريين زيه، وبالنسبه للكويتيين اللى بيتابعونا على الصفحة إحنا بنوصيكم على العماله المصريه اللى عندكم احنا اخوه وبنخاف على بعض.
