ضبط مصري يهرب ذهب بمليون جنيه في أغرب مكان لا يمكن توقعه!!

عامل فيها ناصح وجاى بربع كيلو دهب يبعهم في مصر بأكتر من مليون جنيه، وأتاريه بيهرب الذهب بطريقة لا تخطر على بال حد وهو بيهربها في الملابس الداخلية.

لكن لأجل حظه ظباط الجمارك ظبطوه، في التقرير ده هنعرف مين هوا المصرى ده .. وظباط الجمارك عملوا فيه إيه؟ وكان بيحاول يهرب الذهب إزاي؟

ظباط الجمارك طلعوا واعيين بردوا، قفشوا واحد مصري جاى من الكويت كان معاه ربع كيلو ذهب، ذهب أصلى عيار 24 جايبهم على شكل سبائك عشان يبيعهم في مصر، وأنتم عارفين الدهب هنا وصل لكام دلوقتى، ده على الأقل خالص الربع كيلو ده يعمل مليون جنيه، وهو اللى جايبهم من بره ارخص من كده بكتير.

المهم هنحكى ليكم التفاصيل بالظبط عشان تعرفوا ظباط الجمارك طلعوا واعيين قوى ازاى، ببساطه ياجماعه وزى ما خبر موقع القاهرة 24 قال فا المصرى ده كان جاى من الكويت على مصر عن طريق طائرة نزلت في مطار سوهاج الدولى، اللى فيه تم القبض على المصرى وهو معاه تقريبا ربع كيلو دهب في هيئة سبيكتين.

كل سبيكة من اللى كانت معاه كانت ملزوقة بلزق شفاف على رجليه وموجودين في ملابسه الداخليه، ده على حساب يعنى أن رجاله المطار مش هيفتشوا هنا وهو مش واخد باله أصلا أن فيه أجهزة تفتيش ذاتيه دلوقتى بتطلع كل كبيرة وصغيرة، وصاحبنا حاول يعدى من جهاز التفتيش بسرعه قبل ما يصفر ويعرف ظباط الجمارك بيه، بس لأجل حظة الجهاز اكتشف اللى معاه بسرعه وصفر سمع كل رجال التفتيش اللى كانوا في المطار.

وطبعا بعد ما أكتشف رجال التفتيش بالدهب اللى مع الراجل مسكوه وسألوه هوا مخبى الدهب كده ليه، والراجل قر على طول أنه كان جايب الدهب وعايز يعديه من المطار عشان ينزل يبيعه في مصر ويكسب فيه، المكسب بتاعه طبعا كان هيكون كبير لو عدى بيه، الربع كيلو دهب دلوقتى يعمل حوالي مليون جنيه مصري.

الفكرة بقى أن المصرى اللى حاول يهرب الدهب ده، راجل متعلم معاه بكالوريوس تجارة، يعنى أكيد عارف ان اللى عمله ده غلط ويستوجب العقاب، لان لو كل واحد عمل زيه هيبقى الوضع مش كويس خالص، ولا أنتم أيه رأيكم ؟ .. أبقوا اكتبوا في التعليقات.

نرجع لموضوعنا ونشوف ايه اللى حصل فى الراجل بعد ماتم اكتشاف الدهب اللى معاه، على حسب موقع القاهرة 24 فا ظباط الجمارك في المطار أخدوه وعملوله محضر تهريب واتحول المحضر ده على جهات التحقيق اللى هتقوم بدورها وتحقق مع المتهم وتجيب قراره، وغير كده فا الدهب اللى معاه اتصادر خلاص، لو المتهم عايزه فا لازم يدفع عليه جمارك اللى أكيد هتكون رقم كبير على قد قيمة الدهب اللى هوا جايبه.

لحد هنا ونكون وصلنا لنهاية الفيديو، وقبل ماقفل عايزه أعرف رأيكم ايه في رجاله الجمارك، قايمين بشغلهم كويس ولا لأ، ورايكم ايه بردوا فى اللى حاول يهرب الدهب ؟ .. اكتبوا رأيكم في التعليقات .