ياوجع القلب، العروسة وأبوها راحوا فجأة ، كانت رايحه تأكد على فستان فرحها اللى هتلبسه بعد يومين، بس للأسف قابلتهم عربيه أنهت حياتهم، العريس مش مصدق نفسه، إزاى كان بيستعد للفرح ومره واحده يشيل بنفسه عروسته لمثواها الأخير.
واقعه حزينه قوى لبنت الشرقية شهد ووالدها حمادة، كانوا خلاص فاضلهم يومين على الفرح، بس حصل اللي حصل .. إيه اللى حصل لشهد والسبب في رحيلها هي ووالدها مرة واحدة ؟ .. وليه كل الناس بيتكلموا عنهم في الشرقية دلوقتى ؟ .. كل ده وأكتر هنعرفه مع بعض في التقرير التالي:
النص: الحزن مالى الشرقية كلها النهارده، مافيش واحد فيها يعرف اللى حصل للبنت شهد ووالدها الأستاذ حمادة الا وتلاقي عنيه تذرف بالدموع، البنت وابوها كانوا راجعين من حجز فستان فرحها اللى بعد يومين، وقدر ربنا أن عربيه متهورة تقابلهم في الطريق تكون السبب في إنهاء حياتهم فجأة.
من شوية كانت الصلاة على البنت شهد ووالدها الأستاذ حماده، وصورت الكاميرات لحظة في قمة الحزن للعريس، عريس شهد وهوا شايل البنت على كتفه عشان تروح لمكانها الأخير، لك أن تتخيل موقف العريس يعنى بدل ما كان هيفرح بعروسته بعد يومين يقوم يشيلها النهارده لمثواه الأخير.
لو جيت تفتح الفيس بوك دلوقتى أو أي صفحه مهتمه بأخبار الشرقية هتلاقى الكل بيتكلم على البنت ووالدها، الكل زعلان على قصتهم، البنت ياحول الله كانت بعتت جهازها كله لشقتها وخلاص كل الحاجة اترصت مكانها والبيت كله جاهز ليها وفى احسن صوره، لكن للأسف مش هي اللي هتسكنه، ماهى خلاص روحها طلعت للى خلقها.
اصحاب العروسة والمقربين منها بيقولوا أنها كانت راجعه هي ووالدها الأستاذ حمادة من عند المكان اللى كانو حاجزين منه فستان الفرح، كانوا هناك بيأكدو حجز الفستان اللى هتحضر بيه، بس وهما راجعين على طريق كوبرى أبو عامر في صان الحجر كده قابلتهم عربية، العربية كانت السبب فى أن حياتهم تنتهى كده مره واحده، واللى يزعل بقى جدا أن صاحب العربية أخدها وجرى على طول ماوقفش حتى يشوف مالهم ولا حتى ياخدهم لأقرب مستشفى يمكن كان لحقهم.
أما معاينة جهات التحقيق لمكان الواقعة فا قالت أن سواق العربية كان ماشى بيها بسرعة كبيرة جدا وبدون قصد قابل العروسه ووالدها صدفه، العروسة وأبوها كانوا راكبين موتوسيكل اللى لما قابلته العربية بالشكل المفاجئ ده، أيده فلت من على الموتوسيكل وطار في الهواء هو وبنته شهد كام متر في مشهد مبكي يشبه المشاهد السينمائية.
وعشان كده الأجهزة الأمنية دلوقتى فى مديرية أمن الشرقية شغاله بتدور على مين صاحب العربية دى، عايزين يعرفوا هوا مين ويمسكوه يقدموه للعدالة، ماهو كان ممكن لو أخدهم بعد الواقعة على أقرب مستشفى، كان ممكن تم إنقاذهم، ده على حسب كلام الأهالى على فيس بوك اللى تناقلوا الواقعة واتكلموا عنها.
