إن كنت تريد السفر للخارج فيجب أن تعرف الحد المسموخ به من الدولار سواء داخل مصر او خارجها حتى لا تتعرض للمسائلة القانونية، وذلك حتى لا يحدث معك مثلما حدث مع أشخاص قامو بتهريب الدولارات للخارج داخل الفراخ المجمدة، لمعرفة مزيد من التفاصيل والعقوبة التي تنتظرهم تابعونا من خلال التالي:
الدولار حواراته مبتخلصش،رغم إنه سعره الفترة مش مستقر نهائي وطالع في العالي، إلا اننا هنقولك لو انت معاك دولارات وعايز تسافر بيها مسموحلك تسافر بقد إيه؟
وده بعد ما ظهرت الفترة الاخيرة حوادث تهريب العملات الاجنبية وبالاخص الدولار، بطرق غريبة واخرها كانت من يومين لما اتقبض على أشخاص في مطار القاهرة مهربين 143 ألف دولار، ومبلغ أكتر من 91 ألف يورو، حسب كلام وزارة الداخلية .
الغريب بقى إنها متهربة جوا فراخ مجمدة ! الفراخ المحشية رز دي كانت زمان.. دلوقتي بنحشيها دولارات.
سواء بتسافر كتير او لا، نتعلم من أخطاء غيرنا بقى ونعرف الحد المسموح بيه في المطارات، بالنسبة للفلوس الكاش.
ودي القيمة اللي بيحددها قانون البنك المركزي والجهاز المصرفي للنقد.
بما ان اغلب الناس بتسافر برا مصر بغرض السياحة وبياخدوا معاهم مبالغ كبيرة، الدولة حطت اجراءات مهمة جدًا، لأنها بتقلق من السفر بمبالغ كبيرة، باعتبار انها ممكن تستخدم في غسيل الأموال أو تمويل العمليات الإرهابية أو أنها تكون مش مسجلة في سجلات الضرائب.
لو خارج من مصر.. مسموح للراكب وقت المغادرة أو الوصول إن يكون معاه مبلغ 10 آلاف دولار أمريكي، أو نفس قيمتها بعملات اجنبية تانية، بس بالجنيه المصري مش مسموح للمغادر إنه ياخد معاه أكتر من 5 آلاف جنيه.
لكن في حالة إثبات وجود مبلغ أكتر من 10 الاف دولار أو مقدارها بأي عملة اجنبية او عربية تانية، عقوبتها بتبقى التحفظ على المبلغ ده، وبيتحول الراكب على نيابة الأموال العامة، وهناك بقى يإما بيصدر قرار إفراج عنه أو لا.. انت وحظك.
لكن في الاغلب الامور بتمشي تصالح، مقابل مصادرة جزأ من الفلوس لخزانة الدولة، وده اللي بتحدده نيابة الأموال العامة.
أما لو داخل مصر.. مفيش مبلغ محدد ملزوم منه الراكب، سواء بالدولار أو الريال أو العملات العربية والأجنبية التانية
بس ضروري جدًا لو داخل بمبلغ أكتر من 10 آلاف جنيه، لازم تذكره في استمارة الجمارك وقت السفر لمصر
أمن نفسك يعني..
وبالمناسبة المطارات فيها حكايات كتير أوي سلبية وايجابية، واجراءات اكتر عشان تسافر بامان، وواجب عليك كمسافر إنك تلتزم بالقواعد اللي بتفرضها عليك الدولة والوزارات.
الاهم من ده إنك متعملش نفسك ذكي على رجال الامن ، مش معنى إن طوابير التفتيش والاجراءات الامنية بتاخد وقت طويل، انك تحاول تتخطاها، لانه في الاخر هيقع بضرر عليك انت، زي انك ترفض طريقة تفتيش معينة، بغرض انك تنجز وقت، لانهم ممكن يشكوا فيك وميفهموش نيتك.
ها بقى قولنا معاك كام دولار تسافر بيهم؟
