فاكرين البلوجر موده الأدهم، البنت صاحبة الشعر الأصفر والتي كان لها العديد من الفيديوهات المنتشرة على فيس بوك وتيك توك، و اختفت فتره بعد القضية التى كانت مرفوعه عليها بتهمة نشر فيديوهات خادشة للحياء العام.
اهى البنت دى النهاردة ممكن تفلت من القضية اللى عليها، إزاى بقى تفلت، ده اللى هنشرحة ليكم دلوقتى، من شويه طلعت محكمة النقض قرارا بقبول النقد اللى كانت تقدمت به موده الأدهم من فترة على حكم حبسها 6 سنوات على اثر اتهامها بنشر فيديوهات خادشة للحياء العام.
الكلام اللى جاى ده ممكن يقلب القضية حرفيا ويخليها لصالح موده الأدهم، فا ركزوا قوى وخدوا بالكم، نيابة النقض سجلت مذكرة رقمها 12737 لسنة 91 قضائية، وحددت لها جلسة في 11 فبراير اللى جاى للمرافعة في الحكم اللى صدر قبل كده ضدها، وهو الحبس 6 سنوات.
نقض النيابة شاف الموضوع من زاويه تانيه خالص غير اللى شافتها المحكمة قبل كده واللى عليها طلعت قرار الحبس، النيابة النهاردة قالت في المذكرة بتاعتها أن الحكم اللى صدر قبل كده كان فيه عبارات عامة وصور مجملة ولا يحقق الغرض اللى قصدة المشرع من استيجاب تسبيب الأحكام بما لا يسمح لمحكمة النقض من مراقبة صحة تطبيق القانون على الواقعة اللى عملتها موده الأدهم ولم يبين تفاصيل الوقائع والأفعال اللى قامت بها البنت.
مش بس كده دى كمان شافت أنه لم تظهر عناصر الجريمة ومافيش أي ترابط بينها وبين الشروط والقوانين اللى عملاها الحكومة عشان تثبت الاتهامات المنسوبة لموده عليها.
المفاجأة بقى ان النيابة قالت أنه لو موده مفيش اثبات قوي عليها متفق في إجراءات الحصول عليه مع القوانين المصرية، موده ممكن تطلع براءة وتفلت من الحكم اللى اتاخد عليها من فترة، الـ 6 سنين حبس دول، تخيلوا لو كانوا أطبقوا مستقبلها كان هيروح حرفيا، ومش هتلاقى أي حاجه تعملها في حياتها بعد ماتطلع، ما هى هتبقى سوابق، وأنتم عارفين في الشغل دلوقتى الكل بيبعد عن السوابق، ماحدش ناقص، الناس اللى أرشيفها حلو ماليه البلد يعنى.
المفاجأة الأكبر بقى أن النيابة في مذكرتها النهاردة، أوصت بإلغاء الحكم تماما على موده الأدهم، لان زى ماهما شايفين أن الحكم الاولانى طلع بناء على تحريات الشرطة فقط، واثبت النيابة أن تحريات الشرطة مش كلها صح، فيه منها فيه غلط ولبس، وهنا عملوا بمدى طالما فيه غلط في جزئية يبقى باقى الكلام غلط.
ياترى بقى موده الأدهم يوم 11 فبراير اللى جاى ده هاتطلع فعلا من القضية براءة، ولا المحكمة مش هاتاخد برأي نيابة النقض ويكون عندها صورة تانية للقضية، ده اللى هنعرفه وقتها.
المهم دلوقتى أن مودة الأدهم أكيد في حالة معنوية حلوة جدا، بعد ماسمعت بقبول النقض بتاعها واحتمال خروجها من الحبس، فهل لما تطلع بقى من الحبس هترجع تعمل الفيديوهات اللى كانت بتعملها قبل كده دى، ولا خلاص هاتتوب عن كل الكلام الفاضى ده، وتلتزم بتعليمها بقى وتشوف أي شغلانه كويسه تشتغل وتصرف على نفسها.
لو حد فيكم يعرف ممكن موده تعمل إيه بعد ماتخرج من الحبس يكتب في التعليقات.
