مشهد احتراق ملايين كانت محفوظة في غرفة تحت الأرض، أثار الجدل بشكل كبير على مواقع التواصل، فانقسم النس بين ناس حزينة على تلك الملايين التي كان من الممكن أن تحتل العديد من المشكلات، والبعض الآخر تساءل عن سبب حفظها في هذا المكان الغريب، تابعونا لمعرفة ما حدث بها في النهاية:
معلش هصدمكم بس عمر الفلوس دى ما كانت ولا هتكون لولا واحد فيكم، ولا فيه حد فيكم هياخد منها جنية واحد اللى لو كان شغال مع صاحبها اللى هو رجل أعمال شهير في منطقة المهندسين بالقاهرة اللى فوجئ من كام يوم كده أن الخزنة بتاعته اللى عاملها تحت الأرض، تحت جراج شركته، بتشعلل.
قبل ما نقول اللى حصل لازم نوضح أن اللى نشر الفيديو ده هما موقع القاهرة 24 ، نروح بقى للى حصل واللى هوا غريب وفيه تفاصيل كتير، أولها أن لحد دلوقتى ماحدش فاهم ليه راجل أعمال كبير وواعى يحط 25 مليون جنيه في مكان واحد والمكان ده مش بنك حتى ولا في أمان الحكومة، لا ده حاطه تحت شركته، يعنى ببساطه خالص كل موظفين الشركة أكيد عارفين أن فيه فلوس وفلوس كتير لدرجة أن أي حد ممكن يطمع فيها.
وده اللى حصل فعلا فيه واحد من اللى شغالين فى الشركة دى طمع وحاول يسرق الفلوس، جزء من الفلوس، أكيد مش كلها يعنى لأنه أصلا مش هيقدر يشيلها كلها حتى لو كان مين، اللى حاول يسرق الفلوس دى كان اللى هوا المفروض عليه يكون حامى الفلوس، وهو واحد من أمن المكان.
وعلى حسب المواقع الأخبارية المختلفة فا الراجل حاول يسرق جزء من الفلوس وهو سرق بالفعل شنطة كاملة ملاها لأخرها فلوس واداها لأبنه يخبيها عند أخته في منطقة حدائق القبة، قال يعنى عشان ماحدش يعرفها.
بس الحقيقة أنه انكشف، وانكشف لأنه غبى، وغبى ده مش وصفنا إحنا ده وصف المواقع الأخبارية بردوا اللى قالت أن غبائه خلاها يشعلل في الفلوس الباقية في الخزنة عشان ماحدش يعرف أنه أخد حاجه منها، اتفزلك يعنى والفزلكة دى راحت على فاشوش لأن الراجل صاحب الشركة بلغ الشرطة اللى راحت بسرعه جدا هي وعربيات الأطفاء اللى حاولوا على قد مايقدروا أنهم يطفوا الفلوس من اللى حاصل فيها.
وطبعا لما الشرطة راحت فا فيه “سين و جيم” أسئلة من اللى قلبك يحبها، ليه الفلوس دى هنا ؟ بتعمل ايه ومين اللى يعرف مكانها ؟ والأهم مين اللى عمل فيها كده أصلا ؟ .. وكان أول شك في عامل الأمن اللى من غبائه الزياده على اللزوم أنه كان مبدل ميعاد شغله كمان، يعنى هوا معاده المفترض أنه يكون الصبح هوا بقى بذكائه راح بليل، وطبعا عشان يسرق الخزنة.
المهم أن الشرطة مسكت عامل الأمن ده وظبطته وأعترف باللى عمله، المشكلة دلوقتى فى الفلوس اللى اتفحم تدى مصيرها إيه دلوقتى ؟ .. والحقيقة أن مافيش أي حاجة رسمية نقدر نقولها فيها، لكن الأخبار اللي بتتداول كانت مفاجأة عن أن راجل الأعمال ده مأمن على فلوسه وشركة التأمين احتمال تعوضه عنها.
لحد هنا نكون وصلنا لنهاية الفيديو وقبل مانقفل حابين نعرف رايكم في الحركة الغبية اللى حصلت فى الفلوس دى، واحساسكم أيه وهى بتتفحم كده ؟ .. اكتبوا رأيكم في التعليقات.
