بعدما رحل وفارق الحياة ومن وقت هجوم كلب المذيعة الشرس علي مدير البنك فى كمبوند بالشيخ زايد ،والناس تسأل ما السبب فى رحيله ولماذا دخل فى غيبوبة لأكثر من شهر ،وحالته كانت بتسوء وفى النازل !هل السبب هجوم الكلب أم أخطاء طبية عندما نقل المستشفى ؟
كل الإجابات لكل الأسئلة دى وأكتر كشفتها تحقيقات النيابة فى الواقعة من البداية ولحد السبب المباشر فى رحيله! واللى قالته مراته صادم ربنا يصبرها وترجع حقه بعد رحيله!
حالة حزن كبيرة على السوشيال ميديا ،من وقت إنتشار الاخبار برحيل محمد محب اللى هجم عليه كلب المذيعة أميرة شنب ،والجمهور إتقسم جزئين .
الجزء الأول:بيطالب بحق الراحل وبتطبيق عقوبة شديدة على المذيعة وزوجها “صحاب الكلب”،وبدأوا يدوروا على العقوبة المنتظراه ممكن تكون إيه!
والجزء التانى بيدور وراء السبب الحقيقى لرحيله هل لما الكلب أكل دراعه ورجله ،ولا الإسعافات اللى حصلتله فى المستشفى لما وصل.
التحقيقات كشفت إن المجنى عليه أخد جرعة واحدة من مصل تطعيم “عقر الكلب” فى مستشفى دار الفؤاد ، وبعدين إتنقل لمستشفى تانية لإجراء العمليات الجراحية اللازمة له،وهناك خد الجرعة الثانية من المصل، ولما بدأوا يعملوا إجراءات العملية وخد المخدر ..قلبه إتوقف ويقال حوالى 30 دقيقة وفقد المجني عليه وعيه،ومراته الشاهدة قدمت تقريرًا طبي ثابت فيه تفصيلات حالته الطبية.
النيابة العامة راحت المستشفى الأخيرة وسألت طبيب الطوارئ واستشاري جراحة العظام والمفاصل الللى إستقبلوه يوم الواقعة وأكدوا إنه لما وصل كان واع ومدرك باللى حصله
المجنى عليه إتحجز فى غرفة عادية بالمستشفى، وأجريت له بعض التدخلات العلاجية لتنظيف جرحه بمحلول الملح تمهيدًا لإجراء عملية جراحية له،وخدوا الموافقة منه ومن أهله وخد المخدر ..قلبه وقف وحاولوا ينعشوه لحد ما رجع للدنيا تانى وقلبه إشتغل ..ومن وقتها دخل الغيبوبة لمدة شهر ومخرجش منها تانى وإتحط فى العناية المركزة ..
وقالوا إن السبب فى اللى حصله هو دكتور التخدير..
و النيابة إستجويت دكتور التخدير أكد بردوا إنه كان كويس لما وصل ،ولما عملوله الفحوصات قبل التخدير كان عنده أرتفاع فى ضغط الدم بس، وإنه جاهز للعملية عادى ،وكل اللى حصل لما خد المخدر حصله انخفاض لنبضات قلبه وضغط دمه،لحقوه أدوية تانية لكنه مستاجبش فعضلة القلب وقفت،وقال إنهم ميقدروش يحددوا السبب بالظبط ،لكن هو رجح إن مصل الكلب اللى أخده فى دار الفؤاد هو اللى عمله ضعف فى عضلة القلب ،وإن عقر الكلب له ممكن يعمله مرض يخلى القلب يوقف ..
النيابة كانت تباشر تحقيقاتها في الواقعة طول فترة إيداع المجني عليه فى المستشفى انتظارًا لاستقرار حالته الصحية لتحديد سند المسئولية الجنائية..هل خطأ طبى ولا عقر الكلب ؟
لحد ما تلقت النيابة العامة إخطار برحيل المجني عليه من كام يوم ، فأمرت بسرعة نقل جثمانه إلى مصلحة الطب الشرعي لإجراء الصفة التشريحية عليه علشان يعرفوا سبب الرحيل المباشر وفحص الأوراق الطبية والعلاجية الخاصة به؛ لتحديد إذا ما قد اتُّبعت الإجراءات الطبية الصحيحة معه وفقًا للأصول المتعارف عليها من وقت وصوله للمستشفى من عدمه، وبيان إذا ما كان فى خطأ طبي حصل مع الإجراءات دى، ولو فيه فعلا درجته ومدى جسامته وعلاقته بالمجنى عليه قد إيه
وعلشان يكون فى سرعة فى إنجاز التحقيقات، انتقلت النيابة إلى المستشفى وسألت الأطباء المختصين بإعداد التقارير والأوراق المطلوبة من مصلحة الطب الشرعي، وأشرفت على إرسالها لها زى ما طلبت.
النيابة العامة أكدت إنها هتعلن في بيان رسمي نتائج التحقيقات، ولحد ما ده يحصل هيستمر حبس المتهم احتياطيًّا على ذمة التحقيقات، وده بعد عرضه على المحكمة المختصة واللى أمرت بعد نظر الأوراق بمد حبسه احتياطيًّا.
