25 مليون جنيه تحت الأرض أصبحوا رماد! والدخان انتشر في المكان والملايين التى كانت تلمع إنطفئت وإختفت لم يبقى لها أثر..حكاية غريبة لغرفة تحت الأرض إسمها “أوضة الكنز” فى شركة فى منطقة العجوزة صاحبها رجل أعمال مشهور ..
مش هتصدق الواقعة حصلت إزاى !وتفاصيل الحكاية قلبت السوشيال ميديا الساعات اللى فاتت !والكل بيسأل حصل إيه ؟من أين لك هذا25 مليون جنيه مرة واحدة! ! والغريب إنها كانت واقعة سرقة وقلبت بإن الدخان ملى المكان ..أنا هقولك حصلت إزاى!
فى اليوم ده غير معاد شغله خلاه بليل بدل الصبح..علشان يعرف يعمل عملته ويبقى لا من شاف ولا من درى ..ورغم إنه فرد أمن “المفترض إنه فاهم فى المراقبة والكاميرات وعارف إن السكة دى سكة اللى يروح مبيرجعش” إلا إنه قرر يسرق الشركة دى .وده حسب ما نشره موقع مصراوى..
كل الحكاية إن العقيد أحمد الدسوقي مأمور قسم العجوزة تلقى بلاغا من موظفى أمن بشركة “الـ” لحديد التسليح بشارع دمشق تحديدا العقار رقم 34 – بإن الدخان مالى المكان ولاقوا بقايا فلوس سوده ومعالمها مش باينة جوة الشركة وكمان أكتشفوا سرقة مبالغ مالية من داخل اوضة زى مخزن كده فيها أكثر من 25 مليون جنيه وعملات أجنبية كتير تانية ..وبيقولوا عليها “غرفة الكنز”
تم فرض كردون أمني لتسهيل مهمة رجال الدفاع المدني والحفاظ على سلامة المارة وسكان العمارات والأماكن القريبة!
وعلى طول فريق بحث قاده المقدم حسام العباسي رئيس مباحث العجوزة توصلت جهوده إلى أن فرد أمن بالشركة هو مرتكب الواقعة دى اللى بدأت وإنتهت بالدخان! خاصة إنه اول حد شكوا فيه لما غير معاد شغله من الصبح لبليل فى نفس يوم الواقعة..وعلشان يتأكدوا تم فحص كاميرات المراقبة ومراجعة خطوط سيره ..إتضج فعلا إنه المتهم الأساسى للواقعة دى .
وتم القبض عليه ،وأعترف وأقر بعملته دى ..وقال إن الفلوس زغللت عينه وقرر إنه يسرقها ..وحكى تفاصيل اللى حصل بالظبط وقال :
أنا حضرت المعدات اللى هستخدمها علشان أقدر أكسر باب الأوضة وإدراج المكتب اللى موجود فيها ،وفعلا عملت كده ودخلت ولميت اللى أقدر عليه من الفلوس فى شنط كبيرة كانت موجودة فى الأوضة ..وبقيت احدفهم للدور الأرضى “وهنا المكان اللى الفلوس أتحولت فيهم لتراب” والدخان ملى المكان ..
المتهم بيقول إنه حط شوية فلوس فى شنطة صغيرة “تنفع وقت زنقة”وإداها لإبنه لما عدى عليه وقاله تروح به لعمك فى حدائق القبة ..وعلشان يلهى الناس ومحدش ياخد باله باللى بيعمله عمل خطة ولكن إتقلبت عليه وهى إنه دلق بنزين فى الشركة علشان الدخان يملى المكان والكل ينشغل به وهو يكون هرب بالفلوس! لكن للأسف ملحقش يهرب بالفلوس وكانت الولعة وصلت للملايين دى وبقيت عبارة عن تراب أسود!
وهنا فرد الأمن لا طال بلح الشام ولا عنب اليمن ..وطلعت من الواقعة دى بلا حمص أو بمعنى أصح بلا ملايين!
طبعا تم القبض على إبنه ،وفعلا لاقوا معاه الشنطة وجواها عملات أجنبية ومحلية كتير جدا..
المفاجآت بقى موقفتش هنا بس عند الفلوس اللى بقيت تراب!لا الشرطة إكتشفت إن فى أوضة زجاجية تانية سرية فيها مبالغ كبيرة جدا قدر رجال الحماية المدنية يوصلولها قبل ما تولع هى كمان ..وطبعا ده كله كان وسط زهول منهم والدهشة ! اللى هو معقول!كل الفلوس دى منين وبتاع إيه ..والكل لسه بيسأل لحد دلوقتى من أين لك هذا ؟
https://media.gemini.media/img/Original/2023/5/1/2023_5_1_19_43_25_782.jpg
لسة الغرف السرية وغرفة الكنز لغز !مفيش تفاصيل لحد دلوقتى عن اللغز ده ..لكن أكيد الساعات اللى جاية الشرطة هتقدر توصل لحكاية الغرف السرية اللى مليانة ملايين دى !
والاهم سبب بناء صاحب العقار الغرف دى إيه بالظبط ومصدر الفلوس منين!
