علاقة غير مفهومة بين خالد الغندور والمستشار مرتضى منصور، رئيس نادى الزمالك، من فترة المستشار كان رافض تجديد التعاقد معاه وخلال الساعات الماضية مضى معه عقد أغلى من نجوم الكرة.
ليه مرتضى منصور عمل كده؟ وليه كان التأخير أصلا في تجديد العقد مع الغندور؟.. كل ده وأكتر هنعرفه مع بعض في الفيديو ده.
زى ماسمعتم كده يا جماهير الزمالك، المستشار مرتضى منصور بيقولكم ماتضغطوش على مجلس الإدارة فى كل حاجه، وأكيد اللى متابع نادى الزمالك والقناة بتاعته يعرف الخناقة الكبيرة اللى كانت بين المستشار مرتضى منصور، رئيس النادى وكابتن خالد الغندور، واللى وقتها طلع المستشار مرتضى منصور بعلو صوته وطريقته المعهوده وقال “الغندور ده ندل ومش هيرجع القناة”.
ووقتها كان قال الغندور أنه بيتعرض لضغط كبير وكفايه عليه لحد كده في قناة الزمالك، وأعلن بنفسه رحيله نهائيا على قناة الزمالك، والغريبة أنه أكد وقتها أنه أكتر من 4 شهور شغال فى النادى ببلاش بعد ما عقدة أصلا كان خلص، بيبقشش عليهم.
من يومين بقى ظهر موقف غريب قوى جمع الإتنين، المستشار والغندور، الاتنين ظهروا في فيديو واحد جنب بعض وكأن الدنيا بينهم عسل خالص، وهى فعلا وقتها وقت الفيديو كانت في احسن حالتها، لان المستشار مرتضى منصور مضى مع الغندور عقد يعتبر أغلى من لاعبى الكرة، على حسب كلام الجماهير الزملكاوية اللى عرفوا قيمة العقد الكبيرة.
ووقت الفيديو طلع المستشار مرتضى منصور يبرر التأخير الكبير في تجديد عقد خالد الغندور، وقال أنه التجديد كانوا متفقين عليه من فتره ومافيش مشاكل بينهم، كل الحكاية أن كان فيه مشاكل وظروف إنسانية صعبة عند الغندور هي السبب في التأخير ده، زوجته كان عندها عمليه كبيرة وكان لازم الغندور يكون جنبها.
ونفس موقف التبرير التزم بيه كابتن خالد الغندور، وقال أنه كان لازم يرجع لقناة نادى الزمالك ويخاطب نادى الزمالك، قال نصا:” بعد ما مشيت حسيت بحب جمهور الزمالك وأنا سعيد بعودتي مرة أخرى للعمل في قناة نادى الزمالك، جددت تعاقدى مع قناة نادى الزمالك وربنا يساعدنى ويساعد المستشار مرتضى منصور”.
ما علينا من موقف الأتنين ببعض، نرجع للموضوع الأهم، الغندور مضى مع قناة نادى الزمالك بكام ؟ وليه عقدة أغلى من لاعبي كرة القدم؟ .
الحقيقة أن المستشار مرتضى منصور كان قال خلال فيديو الإعلان عن التعاقد أن خالد الغندور ماتطلبش زيادة في العقد بتاعه والتزم بكل الفلوس اللى كانوا متفقين عليها قبل كده في العقود السابقة، بس برضوا ما اعلنش المبلغ كام.
وعشان كده جماهير الزمالك حاولت تعرف قيمة العقد وحالة الرضا الكبيرة اللى ظهر بها الغندور، واتكلموا على عقد كان نشرة كابتن شوقى السعيد لاعب الزمالك السابق، لتعاقد الغندور مع القناة، العقد ده كان بتاريخ عام 2019، وقيمة راتب الغندور فيه وصلت لـ 297 ألف جنيه في الشهر يعني في السنة بيعمله من 4 إلى مليون جنيه، متخيلين الرقم،.. ده الرقم اللي بياخده من الزمالك عشان كده الجمهور قال إن عقده أغلى من لاعبي كرة القدم.
لحد هنا ونكون وصلنا لنهاية الفيديو، وقبل مانقفل عايزين نعرف تفسيركم إيه على العلاقة الغريبة اللى بين كابتن خالد الغندور والمستشار مرتضى منصور، وإيه رأيكم في قيمة تعاقد الزمالك مع الغندور ؟، هل الرقم ده يستحقة الغندور فعلا ولا لا ؟ .. اكتبوا رأيكم في التعليقات.
