من جديد عاد المستشار مرتضى منصور رئيس نادي الزمالك للهجوم على الكابتن محمود الخطيب رئيس النادي الأهلي.. لتستمر الخلافات بينهم الفترة القادمة.
مرتضى اتهم الخطيب بأنه أهان رمز الأهلي الكابتن صالح سليم عشان يتحول الأمر لخناقة بينهم على وسائل الإعلام.. إيه اللي حصل؟ وإيه سبب الخناق؟.. تفاصيل كتيرة نكشفها في التقرير التالي:
مفيش شك أن الخلاف الشهير بين المستشار مرتضى منصور رئيس نادي الزمالك وبين الكابتن محمود الخطيب رئيس النادي الأهلي لسه مستمر لغاية دلوقتي على الرغم من مرور فترة طويلة، وناس كتيرة حاولت تتدخل للصلح بينهم ولكن بدون حل لغاية لما وصل الأمر في النهاية إلى القضاء وبقى فيه أحكام وصلت للحكم بحبس مرتضى بسبب سب وقذف الخطيب.
ولكن على مدار الفترة دي البلاغات والاتهامات اللي بتحصل بين الطرفين محدش قادر يوقفها، أخرها كان الهجوم الجديد من المستشار مرتضى منصور رئيس نادي الزمالك، على محمود الخطيب رئيس الأهلي، واتهامه بأنه أهان صالح سليم رمز القلعة الحمراء.
مرتضى منصور قال على قناة الزمالك، إن الخطيب أهان صالح سليم بإزالة صورته اللي كانت جوة النادي الأهلي مقابل أنه يضع صورة حسن حمدي رئيس الأهلي السابق، عشان تبقى إهانة كبير لرموز النادي الأهلي وأعظم مدرب في تاريخه.. مش بس كده لكنه كمل وقال إنه مش هيسكت للخطيب وكان لازم يطلع ويتكلم في المسألة دي لأنها مش تهم الأهلاوية بس لكن كل المصريين لأن صالح سليم رمز للكرة المصرية.
كمان قال إن في الوقت اللي الخطيب بيشيل صورة الأسطورة صالح سليم من النادي الأهلي عشان يحط بدل منها صورة حسن حمدي، كان الزمالك بيكرم صالح سليم، لأنه أسطورة في الإدارة ورمز للكرة المصرية، لكن الأمر ده بيحط سؤال مهم وهو أنه فين مبادئ وقيم الأهلي لما تتشال صورة رمز النادي وأسطورتها بالشكل ده.
مرتضى منصور اتكلم برضو على أزمة الحجز على أرصدة نادي الزمالك في البنوك وقال إن على الرغم من أن ممدوح عباس حصل على حكم بالحجز على أرصدة النادي في البنوك إلا أني أديته صدمة كبرى لما راسلت وزير المالية في خطاب رسمي بأنه ياخد الفلوس اللي في للبنوك باعتبارها المديونيات الخاص بالضرائب على النادي عشان كده ممدوح عباس مش هياخد ولا جنيه من النادي في الوقت اللي الفلوس هتروح في سداد مديونيات الضرائب المتأخرة.
مش بس كده لكنه قال إنه خلاص تم الاتفاق على الرعاية للزمالك واللي هتكون بمبلغ كبيرة وبعد ما يتم توقيع العقود هتنتعش خزينة النادي بفلوس كتير وبالتالي الأزمة المالية اللي في النادي هتتحل وبرضو ممدوح عباس مش هياخد جنيه من النادي.
