على مدار الأسابيع الماضية وأكثر ما يشغل جمهور نادي الزمالك الأزمة المالية التي بيواجهها النادي مع الحجز على أرصدة النادي في البنوك من ممدوح عباس رئيس نادي الزمالك السابق.
لكن فجأة خرج مرتضى منصور وأعلن انتصاره بدون أي تصالح ولا أنه يخضع لشروط ممدوح عباس وحل الأزمة المالية، فماذا حدث وكيف تمكن من توفير الأموال؟..هذا ما سنتعرف عليه من خلال التقرير التالي:
بعد أيام وأسابيع من الاستغاثات اللي كان بيطلع مرتضى منصور رئيس نادي الزمالك يقولها في الإعلام وفي قناة نادي الزمالك عن الأزمة المالية اللي بيمر بيها النادي بسبب حجز ممدوح عباس على أرصدة الزمالك في البنوك بسبب مديونية له حوالي 50 مليون جنيه.
مرتضى منصور اللي كل شوية كان يطلع ويقول إن ممدوح عباس مش راضي يتنازل أو يتصالح إلا بشروط خاصة ليه أولها أن مجلس الإدارة الحالي يرحل عن النادي ويمشي هو مرتضى وولاده من الفريق وده اللي مش ممكن يحصل.. ووسط الكلام الكتير عن أن اللاعبين بتهرب والنادي بينهار ومفيش حل للأزمة المالية رغم تدخل ناس كتير ومسئولين في الدولة.
لكن فجأة خرج المستشار مرتضى منصور، رئيس نادي الزمالك، وأعلن أن الأزمة المالية الخاصة بالحجز على أرصدة النادي هيتم حلها خلال الأيام اللي جاية، وأن كمان هيتم الفترة الجاية الإعلان عن حل لكل الأزمات المالية للزمالك بدون ما يكون في تصالح مع ممدوح عباس ولا أنهم يخضعوا للشروط الخاصة بيه عشان نادي الزمالك كبير ويعلن انتصار قرار الجمعية العمومية واختيارها في مجلس الإدارة.
رئيس الزمالك أعلن أنه هيتم الانتهاء من عقد الرعاية الخاص بالنادي خلال الأيام اللي جاية بعد الوصول لصيغة اتفاق مع الشركة الراعية على كل التفاصيل، ومن هنا هتكون الفلوس اللي جاية للنادي هتحل الأزمة اللي بيعاني منها النادي وهتدفع المديونية بتاعة ممدوح عباس وبالتالي هيترفع الحجز اللي على حسابات النادي.
مرتضى منصور أعلن كمان أن مجلس الإدارة بيحافظ على كل حقوق النادي في كل الاتجاهات، ورغم أن الأزمة المالية هتتحل بالفعل إلا ان الغرامة اللي بتخص كهربا مش هيتم التنازل عنها ولازم يدفعها اللاعب عشان يرجع من تاني يلعب.
في نفس الوقت وجه مرتضى منصور وجه رسالة لجمهور الزمالك بأنه يخفوا على فيراير المدير الفني ومش ينفع نطلع ننتقده كل شوية لأن مش لازم نضغط عليه بعد نتيجة كل مباراة لأن اللعب فيه مكسب وخسارة وده طبيعي والحكم بالنتائج النهائية، ولسه المشوار طويل وكمان هيكون في تدعيمات للفريق في شهر يناير وبالتالي الفريق هيزيد قوة وهيقدر أنه يتغلب على كل المنافسين الفترة الجاية.
