كلام كثير انتشر بين جماهير النادى الأهلى أنه كان فيه خناقة كبيرة جدا بين كابتن سيد عبد الحفيظ، وأليو ديانج، مسكوا في بعض وديانج قطع لعبد الحفيظ القميص الذي كان يرتديه.
ياترى ليه ديانج اتخانق مع سيد عبد الحفيظ ؟ .. وهل الكلام عن خناقة مظبوط أصلا ولا فيها كلام ؟ .. كل ده واكتر هنعرفه مع بعض في التقرير التالي:
الدنيا مش مظبوطه فى النادى الأهلى، على الرغم من الماتش الكويس اللى ظهر بيه النادى خلال مباراة القطن الكاميرونى ، كلام كتير طلع أنه كان فيه خناقة كبيرة قوى بين كابتن سيد عبد الحفيظ وأليو ديانج نجم الفريق، الناس على السوشيال ميديا بتقول أنهم مسكوا في بعض لدرجة أن ديانج قفش في رقبه سيد عبد الحفيظ لدرجة أنه قطع ليه القميص اللى كان لابسة، وستر ربنا لحقهم كهربا قبل ما ديانج ينفعل أكتر ويمد إيده على سيد عبد الحفيظ.
ويقال أن عشان كده تم استبعاد ديانج من القائمة الرئيسة في مباراة القطن الكاميرونى النهاردة، واتحط ديانج على الاحتياطي، والقرار ده صدر بأمر من الخطيب نفسه، قال يعنى الأهلي بيأدبه على اللى عمله مع سيد عبد الحفيظ وعلى مايخلص الماتش والدنيا تروق كده كمان يوم ولا اتنين تطلع الأهلى بقرارات جديدة بحق ديانج تأدبه أكتر على اللى عمله مع عبد الحفيظ.
طيب ليه أصلا ديانج اتخانق مع سيد عبد الحفيظ ؟
الكلام اللى بيتقال على السوشيال ميديا أن ديانج عايز يمشى ويسيب النادى الأهلى ولما قال الكلام ده لسيد عبد الحفيظ، عبد الحفيظ زعق فيه وكلمه بطريقة مش كويسة، ولما ده حصل ديانج ما استحملش الكلام وقام رادد عليه وكمان مسكه مزع ليه القميص وكان هايمد إيده عليه لولا ستر ربنا كهربا كان موجود في اللحظة دى وهدى ديانج شويه.
اللى حصل بالظبط أنه ديانج قال لسيد عبد الحفيظ انا عايز امشي من النادي مش هقدر اقعد هنا تاني انا مكاني في أوروبا ونفسي احترف في الدوري الانجليزي، وعبد الحفيظ رد عليه وقاله مفيش حد هيمشى من هنا الا بمزاجي، انت قاعد و هتكمل معانا لحد اخر عقدك، احنا اللى عملناك، و محدش كان يعرفك قبل ما تيجي الأهلي وما تنساش فضل الأهلي عليك.
لحد هنا ونكون عرفنا الكلام اللى اتقال على السوشيال ميديا بخصوص خناقة دبت بين سيد عبد الحفيظ وديانج، بس ياترى الكلام ده حقيقى ولا لا ؟
اتضح ووفقا لمصادر لموقع تحيا مصر الاخبارى، فا الحوار ده كله ماحصلش نهائي، لا عبد الحفيظ مسك في ديانج، ولا ديانج قطع ليه القميص، وأصلا أصلا الأمور حلوه بين الأتنين، والدنيا عال العال، وأن كل الكلام اللى طلع على السوشيال ميديا ده، كان من بعض الجماهير المغرضة اللى بتحاول تبوظ الدنيا داخل النادى الأهلى.
انتم بقى تفتكرو إيه، النادى الأهلى فعلا حصلت فيه خناقة وهما بيغطوا عليها، ولا مافيش خناقة والدنيا تمام.. اكتبوا في التعليقات رأيكم إيه.
