لا يوجد حديث بين جماهير الكرة في مصر إلا عن الخناقة التي حدثت في مباراة السوبر بين قائد الزمالك محمود شيكابالا وبين لاعبي الأهلي علي معلول وحسين الشحات، تلك المشاجرة التي كانت سبب في حالة من الجدل بين الأطرافوكل طرف يرى الطرف الآخر هو الخاطئ، ولكن تقرير مراقب المباراة كشف عن مفاجأة أن شيكابالا برئ، فماذا حدث؟ وهل سيكون هناك عقوبات على شيكابالا ولاعبي الأهلي؟.. تفاصيل ومفاجآت جديدة نكشفها في التقرير التالي:
كلنا شوفنا الخناقة اللي حصلت في نهاية مباراة السوبر المصري اللي كان في الإمارات بين الأهلي والزمالك لما شيكابالا اشتبك مع لاعبي الأحمر في منظر كان حديث الناس والرأي العام في مصر.
الواقعة دي اللي أثارت الجدل أكتر لما طلع حسين الشحات وقال إن شيكابالا سبه بدون أي مقدمات رغم أنه كان طول الوقت بيدعمه وعلاقة بيه جيدة.. عشان تبقى في حالة جدل بين جماهير الأهلي اللي بتطالب بمعاقبة شيكابالا وبين جماهير الزمالك اللي بتدافع عن قائد الفريق.
لكن الظاهر أن الواقعة دي لسه فيها مفاجآت كتير ده اللي كشفه الإعلامي كريم حسن حسن في تصريحات تليفزيونية وقال إن بداية الواقعة لما توجه على معلول للمقصورة الرئيسية بالاستاد للاحتفال بالهدف الثاني في مرمى الزمالك وهو حق مكفول للاعب ومحدش يقدر يقوله شئ.
كمان قال إن علي معلول لما راح المقصورة الرئيسية رفع رقم واحد وأشار إلى شعار الأهلي على التيشرت بتاعته احتفالات بالهدف، عشان يرد عليه شيكابالا بإشارة رقم 3 بمعنى أن النادي الأهلي حقق المركز التالت في الدوري والزمالك هو حامل اللقب.
كريم حسن شحاتة قال إن الأمر تطور بعد كده لما حسين الشحات بدأ المشادة الكلامية مع شيكابالا عشان تتحول لخناقة كبيرة بين الطرفين في النهاية.
ده نفس الكلام اللي قاله الكابتن أحمد حسن في مفاجأة كشفها عن تقرير مراقب المباراة واللي قال فيه أنه برأ شيكابالا من بداية الاشتباك مع لاعيبة الأهلي. لأن اللي بدأ الخناقة كان حسين الشحات لما سبه شيكابالا بأمه بعد الهدف التانى عشان الأمر يتحول لخناقة بين الاتنين.
لكن على الرغم من براءة شيكابالا عن افتعال الخناقة إلا أنه شارك فيها في النهاية وده بيخلي عرضة للعقوبات زيه زي حسين الشحات اللي هيتعرضوا هما الاتنين للعقوبات.
خبير اللوائح الرياضية عامر العمايرة قال إن عقوبة شيكابالا وحسين الشحات وفقا للائحة عقوبات الاتحاد المصري لكرة القدم هتكون إيقاف من 4 إلى 8 مباريات وكمان دفع غرامة 50 ألف جنيه لأنهم بكده عملوا فعل كان السبب في إثارة الجماهير من خلال الخناقة بينهم.
