مفاجأة جديدة عن مشاركة النادي الأهلي في كأس العالم للأندية على الرغم من عدم حصوله على البطولة بعد ما هزم أمام الوداد المغربي في المباراة النهائية لكي يكون الوصيف.
فكيف سيشارك الأهلي؟ وما حكاية الصدفة العجيبة التي أنصفت الأهلي على باقي فريق إفريقيا. وما حكاية الاتصالات بين الخطيب والفيفا؟.. تفاصيل كتيرة نكشفها في التقرير التالي:
على مدار الساعات اللي فاتت مكنش فيه كلام بين جمهور النادي الأهلي إلا عن الأخبار المنتشرة حول إذا كان الفريق هيشارك في كأس العالم للأندية ولا لاء.. في ظل الأخبار اللي كانت منتشرة عن أن البطولة هتتلعب في المغرب وبالتالي مينفعش يشارك فريقين من نفس البلد فيها وعشان كده كان لازم يشارك فريق تاني يكون ممثل عن أفريقيا الفترة الجاية.
الجدل الكبير اللي كان حاصل بين مؤيد ومعارض الفترة اللي فاتت مكنش حد عارف هيخلص على إيه وهل الأهالي هيشارك في البطولة دي ولا لاء في النهاية.
لغاية لما طلع قرار رسمي من الاتحاد الدولي لكرة القدم فيفا بإعلان دولة المغرب عشان تكون هي مستضيفة بطولة كأس العالم للأندية فى الفترة من 1 إلى 11 فبراير اللي جاي، وده القرار اللي طلع على هامش اجتماع اللجنة التنفيذية التى تستضيفها مدينة الدوحة القطرية.
طيب هل معنى القرار ده أن الأهلي هيشارك في البطولة
وفقا لقانون الفيفا فإن القرار ده معناه أن الأهلي هيشارك في البطولة بالفعل، لأن الفقرة الرابعة من لائحة كأس العالم للأندية بتنص على ألا يسمح لفريقين من دولة واحدة بالمشاركة فى البطولة، وطبعا عشان الفقرة دي مش هينفعش يشارك الوداد باعتبار أنه بطل أفريقيا ويشارك معه الرجاء ممثل عن أفريقيا.
طيب والحل إيه؟
الحل هيكون إن الوداد هيشارك باعتباره ممثل المغرب في البطولة بدل ما هيكون ممثل أفريقيا في الوقت اللي هيشارك فيه الأهلي كممثل للقارة الأفريقية في البطولة اللي اتأجلت إقامتها النسخة الحالية إلى شهر فبراير المقبل، بسبب إقامة نهائيات كأس العالم 2022، فى قطر.
الإذاعة الإسبانية قالت إن لوائح مونديال الأندية بتمنع مشاركة ناديين من نفس الدولة بالبطولة، وبعد إسناد تنظيم كأس العالم للأندية لدولة المغرب ييشارك كل من الوداد بصفته بطل الدوري في البلد المنظم وهيلعب الأهلي بصفته وصيف دوري أبطال أفريقيا.
مصادر داخل الأهلي كشفت عن الصدفة العجيبة اللي هتخلي الأهلي يشارك في كأس العالم للأندية، وهي أن البطولة كانت هتقام في أبوظبي، إلا أن صعود منتخب المغرب للمربع الذهبي في كأس العالم خلت الاتحاد الدولي لكرة القدم يفكر في إقامة البطولة في المغرب تقديرا على الإنجاز اللي عملوه عشان تقام بالفعل هناك وتكون دي الصدفة العجيبة اللي خلت الأهلي هيشارك.
مش بس كده لكن كمان المصادر كشفت عن أن فيه اتصالات كتيرة حصلت الفترة اللي فاتت بين الخطيب والمسئولين في الفيفا عشان يحسم مشاركة الاهلي في الوقت اللي كان الأخبار طالعة عن أنه ممكن يتعمل قرعة بين الفرق الوصيفة في أوروبا وآسيا وأفريقيا عشان يختاروا واحد منهم.
طيب كده مين الفرق اللي هتشارك في البطولة.
النسخة اللي جاية من كأس العالم للأندية هتكون الفرق اللي مشاركة فيها، هي: ريال مدريد (بطل أوروبا) والوداد المغربي (بطل المغرب)، وسياتل ساوندرز الأمريكي (بطل أمريكا الشمالية)، وفلامنجو البرازيلي (بطل أمريكا الجنوبية)، وأوكلاند سيتي النيوزلندي (بطل أوقيانوسيا)، في الوقت اللي لسه مش اتحدد بطل آسيا لغاية دلوقتي وكمان الأهلي بطل أفريقيا.
