الأزمة يوم عن يوم تشتد بين المستشار مرتضى منصور وكابتن محمود الخطيب، المستشار كشف عن مفاوضات سرية تمت معه فى الحبس لأجل عيون الخطيب، وكانوا ييدونه أن يفوت موضوع كهربا.
مين هما اللى تفاوضوا مع مرتضى منصور فى الحبس؟ وإيه علاقة شخصية تقيلة في البلد بحبس مرتضى؟.. وايه هى شروطهم اللى اتكلموا فيها أصلا؟ .. كل ده وأكتر هنعرفه في التقرير التالي:
شكل كده الأيام اللى جايه هتكون شديدة السخونة بين المستشار مرتضى منصور وكابتن محمود الخطيب، اللى اتسبب فى حبس المستشار شهر زي ماكلنا عارفين، وبسببه المستشار جاب اخره وحالف أنه هيرد الصاع صاعين للخطيب، بكل الطرق المتاحة وخلاص اللعب بينهم هيكون على المكشوف.
وأول المكشوف ده اللى كشف عنه مرتضى منصور من شويه، من قيمة ساعة كده طلع في فيديو على صفحته وحكى أن فيه جهه مارداش يقول إسمها حاولت تتفاوض معاه داخل الحبس، لو كان عمل اللى قالولوا عليه كان الخطيب اتنازل عن القضيه ومرتضى طلع من الحبس قبل ميعاده.
وأكد مرتضى منصور أن معركته مش مع النادي الأهلي وإنما مع رئيسه كابتن محمود الخطيب، واللى حاولت ناس ليها مصالح معاه أنها تخلى مرتضى يعتذر له ويحب على راسه كمان، زي ما بيحصل فى أى اعتذار محترم بين أي اتنين.
الحاجة التانية اللى اتفاوضوا معاه فيها هي تقسيط غرامة كهربا على 5 سنوات، ورد عليهم مرتضى منصور وقال: “ابدأ لو هتطلع روحى، لأن الفلوس مش فلوسى دي فلوس النادي وجماهير النادى” وكمان طلبوا منه نسيان قضية نادي القرن، وهوا أمر بإعادة اللافتات في النادي بعد أن تمت إزالتها من فترة.
بس الكلام اللي اتقال عن أن في شخصية تقيلة جدا في البلد هو اللي قدر يدخل لمرتضى منصور فى الحبس على حسب كلامه واتفاوض معه وعايزه يعتذر للخطيب لكن مرتضى رفض مهما كان الضغوط عليه.. ده كمان مرتضى قال إنه وهو جوه الحبس بعت رسايل لأحمد وأمير أولاده وأكد عليهم أن إياهم حد يضغط عليهم ويتهاونوا مع كابتن محمود الخطيب ويعتذر له، قالهم: “اوعوا حد يضغط عليكم للاعتذار للخطيب “لو السماء انطبقت على الأرض”.
وبعد الحوار ده، اتجه مرتضى منصور للحديث عن الجهاز الفنى للزمالك، وقال إنه هيتم الإعلان عن جهاز فني جديد بدل القديم يوم الجمعه اللى جايه، وكان اتفق مع أولاده أحمد وأمير مرتضى منصور على رحيل مدرب الفريق الأول لنادى الزمالك، البرتغالي جوسفالدو فيريرا بالتراضي، وتولى الثنائي أحمد عبد المقصود وحسين ياسر المحمدي إدارة مباراة البنك الأهلي في كأس الرابطة واللى خسرها الزمالك 3 – 0 .
لحد هنا ونكون وصلنا لنهاية الفيديو، واللى حكينا فيه كلام مرتضى منصور وحديثه أن فيه جهه ما حاولت تتفاوض معاه داخل السجن عشان يطللعوه بدري، وهو ماسمعش ولا كلمه من اللى قالوها وعاند معاهم جدا، لدرجه أنه حلف يمين بعظيم ليطلع كل ده على كابتن محمود الخطيب لأنه السبب أصلا في حبسه، انتم رأيكم إيه اللى ممكن يعمله مرتضى منصور ضد الخطيب.
