معقولة محمد مجدي أفشة يترك الأهلي؟.. هذا هو لسان حل جمهور الأهلي في الوقت الحالي مع الأخبار التي تتردد عن عرض من نادي شهير في السعودية للاعب لكي ينضم للدوري السعودي في الانتقالات الشتوية القادمة.
العرض الخرافي الذي قدمه النادي السعودي جعل الأهلي في حالة ارتباك، ما بين أنيوافق أو يرفض، لكن ما هي قصة هذا العرض وهل الأهلي ممكن يوافق؟ وإما حكاية خلافه مع المدير الفني كولر؟ تفاصيل كثيرة نكشفها من خلال التقرير التالي:
حالة من الجدل الكبيرة المنتشرة مع الأخبار أن فيه خلاف كبير بين محمد مجدي أفشة لاعب الفريق وبين المدرب السويسري كولر، وده اللي بان في انفعالات أفشة في مباراة الاتحاد واللي ظاهر عليه فيها إنه كان مضغوط جدا بعد الهدف اللي صنعه لأكرم توفيق عشان يجيب به هدف في الأخر.
الكلام اللي بيتردد عن أن كولر مش مقتنع بيه وشايف أنه لاعب بيضغط على الفرقة ومش بيساعد في طريقة اللعب اللي بتعتمد على اللعب الجماعي مش الفردي ولا فكرة النجم الأوحد اللي يقعد يوزع الكرات على اللاعبية في المباراة، مش بس كده وكمان مع تراجع مستواه بشكل كبير خلال الفترة اللي فاتت خلت أن المدرب السويسري مش بيلعبه بشكل مستمر وده اللي أكد أنه في خلاف بينهم، واللي ظهر في انفعال اللاعب في مباراة الاتحاد.
الإعلامي أحمد شوبير، وجه رسالة هامة إلى محمد مجدي أفشة لاعب النادي الأهلي وقاله خلال برنامجه الإذاعي “مع شوبير”: مينفعش تقلب وشك أنت كلاعب محترف بتلعب وبتتقاضى فلوس والجماهير بتحبك، عشان كده بنقول كلمة في “ودن” أفشة، لا يوجد خلاف عليك يا أفشة أنت لاعب جيد للغاية والأهلي في احتياج إليك، لكن تلعب ربع ساعة أو نص ساعة لا تتكبر الأمر، لأن الأندية الكبيرة زي الأهلي والزمالك وبيراميدز وفيوتشر بتلعب حوالي 55 مباراة في الموسم، فكل لاعب يتقمص ويغضب! لا لازم كل لاعب يتواجد على الدكة يكون جاهز.
كمان الكلام عن الخلاف اللي بين كولر وأفشه جاه بعده كلام عن أن اللاعب جايله عرض خرافي من الدوري السعودي عشان يسيب الأهلي ويمشي، وده اللي أكده الإعلامي سيف زاهر، وقال إن محمد مجدي أفشة، لاعب الأهلي، جايله عرض للرحيل عن القلعة الحمراء في فترة الانتقالات الشتوية الجارية.
سيف زاهر قال خلال برنامجه “أون تايم”، إن العرض الخرافي اللي جاي لأفشة أنه يلعب لنادي الباطن السعودي 6 شهور بس على سبيل الإعارة وهيكون 400 ألف دولار في الـ6 شهور.. لكن مع تمسك الأهلي النادي السعودي رفع المبلغ لحوالي 500 ألف دولار، يعني بسعر الدولار الجديد هيكون الأهلي داخله حوالي 15 مليون جنيه بالمكافآت في 6 شهور بس من إعارة اللاعب، ده غير الفلوس اللي هياخدها اللاعب هناك واللي هتكون بالملايين برضو، لكن مع شرط أنه يضمه بعد الـ6 شهور لو اللاعب والنادي عايزين كده.
لكن ما هو موقف الأهلي؟
الإعلامي سيف زاهر قال إن الأهلر رفض رحيل اللاعب وشايف أن الفريق محتاجه دا الفترة الجاية ومش ممكن يتخلى عنه خاصة أن الكلام عن أنه ممكن يكمل كمان.. لكنه قال إن النادي السعودي في الآخر تنازل عن شرط انضمامه بعد كده.. يعني هيلعب معاهم 6 شهور بس لغاية نهاية الموسم والأهلي هياخد الملايين، والأهلي دلوقتي بيدرس القرار النهائي له.
في نفس الوقت قال اللإعلامي أمير هشام اللي شغال في النادي الأهلي، إنه مفيش أزمة بين أفشة وكولر، وأن سبب غضبه أمام الاتحاد السكندري،هو إحساسه بالتقصير وغيابه عن المشاركات الأساسية وده حق طبيعي لأي لاعب يرغب في التواجد بالمباريات، كمان قال إن أفضة مش طلب الرحيل أو افتعل مشكلة واحدة داخل النادي وحتى لما جاه العرض السعودس هو سايب القرار في إيد الأهلي.
