مباراة القمة الاخيرة من الدورى المصرى وفوز الأهلى بثلاثية نظيفة على الزمالك كانت مثل القشة التى قطمت ظهر البعير ،كانت غير أى مباريات قمة حدثت قبل ذلك في الحقيقة،ومن يومها وتوجد أزمات وتطورات كبيرة تحدث فى الوسط الكروى وخاصة داخل الزمالك. هذا غير الشكاوى التى يقدمها كل نادي في الآخر ،وإستفزازت من اللاعبين للجماهير وإقالة مدربين وإستقالة مسئولين.
أخر الأزمات دى بيقولك شيكابالا معرض إن يتم إيقافه عن 4 مباريات جاية ،إيه الحكاية دى وإيه حقيقة الموضوع ده؟ وهل شيكابالا فعلا متهم بإثارة جمهور الأهلى وإيه علاقة كهربا ؟ ما تيجوا نشوف عمل إيه ؟ ومصيره هيكون إيه …
تابعت المباراة أو متابعتش لأى سبب منعك،أكيد ولو بالصدفة تابعت القرارات الجديدة اللى الزمالك خدتها الساعات اللى فاتت بعد خسارة الزمالك أمام الأهلى، وكمان خسارته أمام غزل المحلة .
كل مباراة حصل بعدها مجموعة من القرارت اللى مكنتش تخطر على بال جمهور الزمالك إطلاقا وسببت إنزعاج لهم الساعات اللى فاتت.
وكانت أخر القرارت دى اللى إنتشرت الساعات اللى فاتت إن شيكابالا هيتوقف عن 4 المباريات الجايين ،والكل بيسأل ليه ؟ وإيه اللى دخل كهربا فى الموضوع؟
بص يا سيدى بالنسبة لكهربا بعد مباراة القمة إنتشر فيديو لكهربا على السوشيال ميديا وهو بيحتفل مع الجماهير وبيقول بعض الألفاط والسباب للزمالك وجماهير الزمالك .
أما بالنسبة لشيكابالا، فكلنا تابعنا بردوا لما وقت عملية الإحماء للاعبى الزمالك كانت ناحية الدرجة التالتة يمين،والأهلى فى التالتة شمال كل فريق إلتزم بمكانه والمكان المخصص له إلا شيكابالا ساب كل الملعب وراح قدام جمهور الأهلى وبدأ يعمل الإحماءات،وبيستفزهم بحركاته.
حتحوت قال فى برنامجه الماتش على قناة صدى البلد، أن شيكابالا لما راح لمنتصف ملعب الأهلي لإجراء عملية الإحماء، لامتصاص الغضب نتيجة السباب اللى بيتعرض له من جمهور الأهلى ،وإنه أخطأ بس لما أشار لجمهور الزمالك، لكن عملية الإحماء والتسخين طبيعية وبتحصل عادى . لأنه عارف إنه كده كده هيتعرض للسب فهو فضل إن تكون قبل المباراة .
طيب كده موقف كهربا قصاد موقف شيكابالا وخالصين ،والإتنين إستفزوا الجماهير ،أه الطريقة مختلفة لكن النتيجة واحدة .علشان كده مرتضى منصور قدم شكوى لرابطة أندية الدوري ضد كهربا، بعد اللى بدر منه تجاه جماهير الزمالك خلال احتفالاته مع جماهير ناديه .
وأشار منصور إنه مستنى القرار من النادي الأهلي “نادي المبادئ”زى ما قال أن يقوم بإيقاف كهربا.حتحوت شايف إن كهربا مش هيتعاقب بسبب أن الفيديو المنتشر له مكانش أثناء المباراة، ولكنه كان بكاميرا موبايل بعد إنتهاء المباراة.
طبعا فى نفس الوقت طبعا الأهلى مسكتش وقدم 3 شكاوى لاتحاد الكرة ورابطة الأندية ولجنة الانضباط وأعلن الأهلى في بيانه،ألفاظ منصور يعاقب عليها القانون خاصة بعد تجاوزه في حق كهربا ووالديه والتحقير منه والتريقه عليه،و تطاول على النادي الأهلي ومجلس إدارته.
طيب يعنى دلوقتى هل فعلا هيتم إيقاف كهربا وشيكابالا؟ عامر العمايرة خبير اللوائح فى مداخلة هاتفية فى برنامجه “+90” على قناة النهار ،أكد أن لجنة الانضباط بالاتحاد المصري لكرة القدم، المتواجدة في الوقت الحالي غير قانونية.
وقال كان من المفترض على مجلس الاتحاد المصري، بعد نجاحه في الانتخابات، إن يتم إجراء جمعية عمومية غير عادية لاختيار لجنة الانضباط، ولكن ده محصلش.العمايرة أكد أن اللجنة لازم تتكون من رئيس ونائب رئيس و3 أعضاء، ولا بد أن تكون مرشحة من المجلس الحالي، واللجنة دى تعمل من الاتحاد السابق.
وعن الشكاوي ضد محمود كهربا وشيكابالا قال: “اللجنة قانونيًا متقدرش تصدر أي قرار ضد الثنائي، وممكن يتم إصدار أي عقوبات ولكن مش هتكون على أسس.
وختم كلامه إن لجنة الانضباط حال أزمة شيكابالا اعتبارتها إثارة الجماهير، فحسب اللائحة يتم إيقافه 4 مباريات حال ذكرها في تقرير المباراة، وكهربا مش هيتعاقب.
تفتكروا هيكون فى نتيجة لكا الشكاوى المقدمة من الأهلى ضد الزمالك ومن الزمالك ضد الأهلى ،هل هتكون قانونية وفقا لكلام عامر العمايرة ؟ شاركونا برأيكوا فى التعليقات.
