عداء غريب وغير مفهوم ما بين المستشار مرتضى منصور رئيس نادى الزمالك وكابتن محمود الخطيب رئيس النادي الأهلي، منذ تولي كلا منهما منصبه ويوجد خلاف بينهما، ونسمع باستمرار عن العديد من الازمات والقواضي بينهما، وأزمة اليوم فيها حديث عن الاستعانة بجهات خارجية ، سوف تؤثر على كرة القدم في مصر اذا تدخلت .
تقريبا كده اتفتح الباب لخناقة جديدة بين المستشار مرتضى منصور، رئيس نادي الزمالك والكابتن محمود الخطيب رئيس النادي الأهلي، ولو كملت الخناقة صوتنا هيوصل بره والفيفا هتسمع بينا، واللى لا قدر الله تدخلت ممكن تزعلنا كلنا كا جماهير الكرة فى مصر.
من شويه طلع المستشار مرتضى منصور في فيديو ووجه كلامه للكابتن الخطيب، وجزء من كلامه ده نقدر نقول عليه نصيحة والجزء التانى نعتبره تهديد.
إيه بقى اللى قاله المستشار ووجه للخطيب؟
المستشار مرتضى منصور تقريبا وصله كلام أن النادى الأهلى هيقدم شكوى للاتحاد الدولي لكرة القدم «فيفا»، فى حاله لو نادى الزمالك قدر يقيد صفقاته الشتوية اللى واقفه في إتحاد الكرة، وده طبعاً زعل المستشار جدا، واللى بدوره عمل فيديو علشان يحط النقط على الحروف مع الخطيب لو عمل الحركه دى، وقاله :”بدل ما انت رايح تشتكي لاعيبة مسجلة فعلًا على السيستم، شوف اللاعب اللي عندك الهارب، الاتحاد الدولي وقتها قال مايشاركش وشارك وإحنا لم نتقدم بأي شكوى عشان مش عاوزين مشاكل، أنا بتجنب أي مشكلة مع الأهلي مش عشانك يا خطيب، ولكن عشان البلد حتى وعشان ماحصلش أي فتنة”.
ومش كده وبس، ده كمل في كلامه، وقال: “بصرف النظر عن الخلاف بيني وبين ومحمود الخطيب، بقول تاني النادي الأهلي كمؤسسة رياضية لها كل الاحترام والتقدير بتاريخها العريق، ببطولاتها بجمعيتها العمومية، بجماهيرها، إنما المشكلة بيني وبين ومحمود الخطيب هتنتهي قضائيًا أو رضائيًا في يوم من الأيام”.
واوعوا تفتكروا أنه سكت لحد هنا، لا ده كمل، واسعوا الجمله اللى جايه دي بقى بيهدد الخطيب حرفياً، بيقوله:”مش عشان المشكلة بينى وبينك هنخلي الجماهير تولع في بعض، وهذه نصيحتي ليك ياخطيب: أنا بقالي 17 سنة رئيس نادى فعندي خبرة، وأنا عضو عامل في النادي الأهلي من 74، ويشرفني ذلك.. رغم ده بيزعل بعض الزملكاوية، فأنا أقدم منك في العضوية، عشان كده أنا عارف قدر الأهلي وقيمة الأهلي زي ما أنا عارف قدر وقيمة نادي الزمالك العظيم”.
لحد هنا ويكون كلام مرتضى منصور خلص، بس القصه لسه ماخلصتش لأن اتضح أن لو حد من ناديي الأهلي والزمالك اتشكى التاني في قصة قيد اللاعبين دى وحوار كهربا، فا الأمور هتتأزم وممكن تطلع قرارات من الفيفا بغرامات على أحد الناديين.
ونيجي بقى لقصه الكلام اللى قاله المستشار مرتضى منصور على شوبير، قال: “لو لمحمود الخطيب، طلع قرار بكرا انك تمشى ابن احمد شوبير اللى مبيلعبش وبياخد 7 مليون، هيطلع يقول عليك من كفار قريش.. تعالى لو مرتضى جاب ابنه الزمالك، هيطلع يقول عليا من أولياء الله الصالحين، وشوبير دا أصلاً عدو نفسه ومش شايف غير مصلحة ابنه، شوبير بيحرج الدولة، وعمال طايح يمين وشمال، وهنخلص منه قريب”.
وهنا نكون وصلنا لنهايه الفيديو وقبل مانقفل حابين نسألكم أنتم إيه رأيكم فى العداء اللى بين الخطيب ومرتضى منصور؟ وإيه الحل لانتهاء الأزمة دي؟.. اكتبوا لينا في التعليقات.
