إمام عاشور سيتعاقد مع الأهلي؟ هذا السؤال يتردد بين جمهور الزمالك الماضية مع انتشار أخبار كثيرة على السوشيال ميديا حول انتقال نجم الزمالك للأهلي، بسبب الأزمات الكثيرة التي حدثت معه في النادي الفترة الأخيرة.
أخر الأزمات دي كانت خناقته مع أحمد السيد زيزو في مباراة حرس الحدود،لكن هل ممكن ينتقل من الزمالك وليه فيراير حذره من مصير كهربا؟ وهل شيكابالا السبب؟ تفاصيل كتيرة نكشفها في التقرير التالي.
مفيش كلام في الفترة اللي فاتت داخل الزمالك إلا عن إمام عاشور من وقت خناقته مع زيزو في مباراة حرس الحدود بسبب أنه كان عايز يلعب ضربة الجزاء في الوقت اللي أخدها زيزو عشان ينفذها باعتباره اللي المدير الفني مختاره لتسديد ضربات الجزاء، لدرجة أن إمام ساب الفريق ومشي بعد المباراة، وكمان في الوقت اللي رافض يجدد فيه عقده مع الفريق.
كل الكلام ده خلى في أخبار تنتشر بقوة عن أن فيه مفاوضات شغالة بين الأهلي وإمام عاشور عشان يروح القلعة الحمراء في الوقت اللي فيه أزمات كبيرة له مع الزمالك، مش بس كده لكن الأخبار المنتشرة كمان عن أنه بالفعل أبلغ المقربين منه أنه هيروح الأهلي اللي عارض عليه فلوس كتير.
الكلام ده انتشر بشكل كبير وعمل حالة من الجدل على السوشيال ميديا بين جمهور الزمالك، خاصة في الوقت اللي ظهرت فيه أخبار من المواقع الصحفية بتؤكد الكلام ده وأن إمام عاشور بيتفاوض عشان يروح الأهلي.
وفقًا للمواقع الصحفية فإن المدير الفني للزمالك فيراير، قعد مع إمام عاشور بعد انتهاء مباراة الزمالك وحرس الحدود وحذره من أنه يكرر اللي عمله مع أحمد سيد زيزو وأنه يطالب أنه يضرب ضربة جزاء في الوقت اللي موجود فيه اللاعب المختص بده لأنه فيه نظام في الفريق ومينفعش أي حد يعمل شئ بعشوائية وبدون الرجوع إليه.
أما عن الأخبار المنتشرة عن انتقاله للنادي الأهلي، فيراير ذكر إمام عاشور بسيناريو كهربا بعدما أهدر لاعب الزمالك السابق ركلة جزاء أمام الأهلي في السوبر اللي انتهى لصالح الأهلي بنتيجة 3-2، وصمم كهربا على تنفيذ ركلة الجزاء على الرغم من أنه مش المسدد الأول وخسر الفريق بسبب ما فعله كهربا، وبعد كده كان مصيره أنه هرب من الفريق وبالتالي هو مش يتمني يشوف إمام عاشور في الموقف ده.
في نفس الوقت رفض فيراير توقيع عقوبة على إمام عاشور وأن أي كلام عن توقيع عقوبات مش حقيقي لأنه اكتفى بالقعدة اللي قعدها معه وتحذيراته له من أن يكرر الموضوع ده تاني.
لكن طارق السيد نجم نادي الزمالك السابق أكد على وجود مفاوضات بين النادي الأهلي ونجم وإمام عاشور، وأن الكلام ده حقيقي بنسبة 100%، وكمان قال إن اللاعب لم يوقع رسميا للنادي الأهلي حتى الآن ولكن لسه المفاوضات شغالة.
