بكاء وتسولات من عامل نظافة غلبان لمسؤول في الحي لكي يرحمه ويترك له العجلة التي يستخدمها في جمع القمامة، تخيل أن تصلقسوة القلب لم تؤثر في المسئول الذي أجبر العامل على جمع القمامة بيده.
ده فيديو جديد انتشر على السوشيال قلب الدنيا لعامل نظافة، بس إيه اللي حصل؟ وليه قعد يبكي عامل النظافة لوحده في النهاية؟ حكاية مؤثرة جدا نكشفها في التقرير التالي:
خلال الساعات اللى فاتت انتشر فيديو على مواقع التواصل الاجتماعى لعامل نظافة، ابكى كل من شاهده، بسبب صعوبة الموقف واللي عمله معاه مسؤول بأحد الأحياء هو والرجالة اللى معاه.
فى الفيديو المنتشر ظهر مدير الحى وهو بيهين عامل النظافة اللي بيتحايل عليه بشدة هوا والرجالة اللى معاه، وطلب يبوس راسهم علشان يسبوا ليه العجلة اللى بيلم بيها بقايا الزبالة وازايز البلاستيك، اللي هى بيبعها وياكل من وراها عيش.
وظهر جحود كبير من المسؤول اللى مارداش أبدا أنه يسمع لكلام عامل النظافة ولا أنه يعبره، وكمان واخد العجلة اللى شغال عليها الراجل وسابه لوحده فى الشارع بيعيط لما نفسه ها ينقطع.
لما حاولنا نعرف فين الفيديو ده اتصور، الناس قالت إن عامل النظافة ده راجل كبير في السن من بورسعيد، تجاوز عمره الـ 50 سنة، وكان بيجمع بقايا الأكل وأزايز المياه البلاستيك من الزبالة، وأي حاجه يقدر يبيعها ياكل من وراه عيش هوا وأسرته.
وطالب عدد كبير من مستخدمى السوشيال ميديا، محاسبة وعقاب مدير الحى هو والرجالة اللى معاه، على اللى عملوه فى عامل النظافة اللى واضح من شكله ان الشقا واكله وبيحاول ياكل عيش بالحلال.
وناس كتير استغربت أن ليه اللى صور الفيديو ده ما حاولش انه يدخل ويحاول ينقذ الراجل ده من بين إيديهم، أو حتى يحاول يساعده ويواسيه.
بس اللى كل الناس دلوقتى نفسها تعرفه ليه مدير الحى والرجالة اللى معاه عملوا كده فى عامل النظافة، ماحدش فاهم السبب، على الرغم من ان شكل الراجل غلبان وعايز ياكل عيش بس من غير ما يدايق حد ولا انه يمد إيده لحد ويشحت زى ما غيره كتير بيعمل دلوقتى.
بنطلب منكم ان اللى يعرف الراجل ده يحاول يساعده ويواسيه ويخفف عنه بعد اللى حصل فيه ده، ويطمئنه ان كل مصر شافت الفيديو وكلهم بيطالبوا أنه يا خد حقه من مدير الحى وأى حد اتصرف معه بطريقة مهينة.
وكمان عايزينكم في التعليقات توجهوا رسالة دعم لعامل النظافة وأسرته.
