الفنان أحمد عز وياسمين صبري عملوا دخول مفاجيء في رمضان هذا العام، بعد ما اعتقد الناس أنهم سيختفون لفترة ولكنهم فاجأوا الجموهر بمفاجأة كبيرة.
الناس بتفتح التلفزيون عادي تشوف الإعلانات بين كل مشهد والتاني في مسلسلات رمضان.. لقت قدامها أحمد عز بالروب والشبشب.. ورايح يتخانق مع حد.. بتفتح الباب طلعت ياسمين صبري جارته في الكومباوند الجديد .. ومن هنا بدأت قصة الحب بينهم.
هي دي قصة الإعلان الجديد اللي شارك فيه أحمد عز وياسمين صبري.. بعد ما كانوا الاتنين مختفيين الفترة اللي فاتت.. أتاريهم كانوا مسافرين في بيروت بيخلصوا الحملة الإعلانية الرومانسية الجميلة دي.. ومش بعيد تبقى بداية قصة حب حقيقية فعلا.
من فترة طلعت ياسمين صبري عشان تسلم أحمد عز جايزة أفضل ممثل في حفل joy awards.. والناس كلها كانت مستغربة اشمعنا؟.. يعني مش أكتر واحدة اشتغلت معاه؟.. ولا معروف إنهم صحاب مثلا.. زي ما منى زكي سلمت كريم عبد العزيز جايزته في مهرجان القاهرة.
أتاري الموضوع ملوش علاقة بالماضي.. قد ما له علاقة بالمستقبل.. أحمد عز كان هو طوق النجاة في حياة ياسمين صبري الفنية.. بعد ما بعدت الفترة اللي فاتت عن رمضان والسينما.. راجعة تاني دلوقتي والبداية كانت بالإعلانات.. بس اللي جاي أتقل.
ما بين فيلم مع محمد عادل إمام.. اللي هو “أبو نسب”.. والمفروض إنه هيتعرض في العيد اللي جاي.. وما بين سفرياتها واستمتعاها بالحياة على طريقتها.. مش بعيد تكون ياسمين صبري لقت اللي هي عاوزاه.
أحمد عز اللي بيغيب عن دراما رمضان السنة دي.. دايما مشغول بأعماله الفنية.. وكمان حياته الخاصة.. مش معنى إن الجيم واخد كل وقته إن قلبه ممكن ميدقش في لحظة.
ماهو ايه اللي هيلم الشامي ع المغربي؟.. خصوصا إن ظهر بينهم كيميا كبيرة جدا في الإعلان.. ده غنالها بصوته يا جماعة.. السنة اللي فاتت كان واقف قدام كارمن بصيبص بيسبل.. بس جاب عزيز مرقة يغني مكانه.
إنما احنا فجأة لقينا أحمد عز بيغني لياسمين صبري وبيقولها.. كنا من أول دقيقة قريبين ولمعة العين.. وكلام كده استغفر الله العظيم رومانسي خالص.. واحنا مش مستحملين.
بصراحة ياسمين لبست شوية فساتين في الإعلان ده آخر شياكة.. والحمد لله مشفناش التايجر خالص.. عشان سيرته بتعمل مشاكل.. وطالما احنا الاتنين سينجل ومفيش ما يمنع.. مش بعيد نشوف تعاون بينهم من نوع تاني يعني، عموما المفروض إن ياسمين صبري وأحمد عز كانوا يعملوا سوا فيلم الفترة اللي فاتت.. بس بسبب ظروف الإنتاج وزيادة الدولار والتعويم.. الموضوع وقف أو اتأجل شوية.. ودي كانت بداية التقارب بينهم على فكرة، هنشوف الموضوع هيقف عن مجرد إعلان وأغنية رومانسية.. ولا الحب هيولع في الدرة.
