في وقت من الأوقات حصل خلاف بين النجم الراحل هيثم أحمد زكي، والفنانة حورية فرغلي، وهذا الخلاف كان سبب إن علاقة في بدايتها تنتهي، القصة يمكن رغم إن فيها جانب إنساني، ولكن فيها أيضا جانب كوميدي ، ودرس تعملته حورية فرغلي، وقررت إن هي تعمل بيه بعد كدة في حياتها، ومتاخدش قرارات متسرعة.. تعالوا نشوف
في كواليس فيلم «كف القمر» اللي اتعرض سنة 2011، اتقابل الفنان هيثم أحمد زكي والفنانة حورية فرغلي، وطبعا زي ما كلنا عارفين كان الفنان الشاب الراحل بيعاني من الوحدة، وهو أصلا بطبعه كان شخص انطوائي شوية.
قبل التاريخ ده بـ6 سنين كان اتوفى الفنان أحمد زكي، والد النجم الشاب هيثم، وسابه في الدنيا لوحده، لأنه مالهوش إخوات أشقاء، وكمان والدته هالة فؤاد اتوفت وهو في سن صغير، وبالتالي كان عايش لوحده، وكان حلمه هو الاستقرار وتكوين بيت وأسرة.
اتقابل هيثم أحمد زكي وحورية فرغلي في كواليس فيلم «كف القمر»، وقربوا من بعض، وكان في علاقة نقدر نقول عنها في البدايات، اللي هو مراحل جس النبض بين الطرفين، اللي بيقربوا فيها من بعض باسم الصداقة، وبيبدأ كل واحد منهم يشوف هينفع مع التاني ولالا.
حورية فرغلي في الفترة دي كانت سنجل وكانت في عز نجوميتها، والفنان الراحل هيثم أحمد زكي كان بيشق طريقه في التمثيل، ولكن طبعا زي ما إحنا عارفين كان وحيد ولسة شاب صغير، وحورية بتقول إن هي كمان بطبعها مكنتش اجتماعية أوي، فاللي هو اتلاقوا في نص الطريق كأن كل واحد فيهم منقذ للتاني.
حورية فرغلي كمان بتقول إن هو كان على طول هادي وساكت وساعات ممكن تلاقيه قاعد لوحده وعينيه مدمعة وأنا كنت عايزة أقرب منه وأنكشه فحصل إن أنا طبعا بحبه وكان بالنسبة لي زميل عزيز وأكتر شوية بس هو ارتبط بيا أنا أكتر عاطفيا بس مكنش ينفع لأن أنا أكبر منه بــ 6 سنين وأنا مقدرش.
فالمذيعة ردت عليها وقالتلها هو الحب يعرف فرق السن؟ هنا بقى كشفت تفاصيل الموضوع وردت على الكلام اللي بيتقال إن المخرج خالد يوسف كان سبب فشل العلاقة دي، وكشفت سر البعد وإن العلاقة دي مكملتش، وهي نقت طبعا إن خالد يوسف ليه علاقة بالقصة.
وقالت إن اللي حصل إن في مرة هي عملت موقف وهيثم كان بيغير عليها فحصلت بينهم خناقة كدة، فهيثم أحمد زكي بما معناه يعني شتمها، وقال شوية كلام كتير، وفي الآخر قالها يا طنط.
حورية فرغلي بتقول إن كل الكلام اللي فات ده مفرقش معاها خالص، واللي فرق معاها بس، إنه إزاي يقولها يا طنط، ومن هنا كانت نهاية العلاقة وبقوا حتى الاتنين لما بيتقابلوا مش بيسلموا على بعض.
هنا الدرس اللي اتعلمته حورية فرغلي إنها متحبش حد أصغر منها ولو بيوم واحد بس، عشان ميجيش يقولها يا طنط دي تاني.
