وضع نادي الزمالك المتراجع خلال هذه الفترة أثر على الحالة الصحية للمستشار مرتضى منصور، حيث تعرض لتعب غريب منعه من الذذهاب إلى النادي خلال الأيام الأخيرة، وأصبح يعقد الاجتماعات في منزله، فما القصة؟ سنتعرف على التفاصيل من خلال التقرير التالي:
أزمة كبيرة بيعشها المستشار مرتضى منصور دلوقتى بسبب الوضع اللى فيه نادى الزمالك وعدم قيد اللاعبين الجدد الذين تعاقد معاهم الفترة اللى فاتت بسبب مشاكل مع اتحاد الكرة المصرى، وده خلاه فى وضع صحى مش كويس خالص، والحالة بقيت لا تسمح أنه يخرج من البيت نهائى، بناء على تعليمات الدكتور ليه.
وعشان كده عمل المستشار اجتماع مع أعضاء مجلس نادى الزمالك، الاجتماع ده كان عنده فى البيت، وخلال الاجتماع كشف المستشار عن مفاجأت أول مره نعرفها عنه، وهو أنه مصاب بتعب غريب محدش يعرف هو إيه لسه، بس زى ما قال ممكن يكون ليه علاقة بالحسد، واللى أثر كمان على نفسيته لما جاله فى الوقت اللى بيعانى فيه من مشاكل كبيرة داخل النادى.
طيب، هل الموضوع ليه علاقة بالحسد فعلا زى ما بيقول، الحقيقة إحنا مانعرفش بس هو طول الفيديو اللى نشرة كان بيكح وبيعانى من السعال والعطس وصوته كان باين عليه الأرهاق والتعب جدا، مش زى عادة مرتضى منصور يعنى، دايما كان بيبقى صوته عالى وفيه دفعه قوية، المرة دى صوته كان ضعيف خالص ومن غير زعيق ولا نرفزة.
المفاجأة التانية بقى أنه مصمم أنه مايدخلش نادى الزمالك خلال الفترة دى لسببين نفسيين، أولهم أنه تعبان علشان موظفين النادى اللى لسه ما قبضتش لحد دلوقتى، والسبب التانى أنه لحد دلوقتى محلش موضوع أزمة قيد اللاعبين اللى اتحاد الكرة مشدد عليه فيها، فهو مصمم أنه مايدخلش النادى غير وهو ناهى الموضوع ده تماماً.
ويكون اللاعبين الجداد اللى مضى معاهم داخل نادى الزمالك ويلعبوا المباريات اللى جايه مع الفريق ويحققوا معه الانتصارات.
ماهو واضح أنه الغرض من دخوله النادى هو إسعاد الجماهير وحل أزمة القيد لأن فريق الزمالك حاليا مش فى أفضل حال ولابد من دعمهم بلاعبين جداد، ده حتى ضرب المثل بميسى، وقال ‘نه نفسه يجيبه الزمالك، وقال نصاً:” أنا أريد أن أتعاقد مع لاعبين من كل مكان عايز ميسي معايا، فعندما يكون هناك ثلاثة لاعبين بحجم منسي وبلحاج وشبانة ويكونوا خارج القائمة فهذا أمر غير طبيعي”.
لحد هنا ونكون وصلنا لنهايه كلام مرتضى منصور عن الأزمة الصحية التي يواجهها الفترة دى، واحتمال تكون أسباب إيه هى السبب فيها، وهنا يكون دورنا نطرح عليكم سؤال إيه التعب اللى ممكن يكون أصاب المستشار مرتضى منصور وخلاه زي ما شفتم كده، وهل الأزمة اللى فيها نادى الزمالك الخاصة بعدم قدرتهم على إتمام قيد اللاعبين الجدد تكون كافيه أنها تؤثر على الحالة النفسية للمستشار مرتضى منصور، ولا هوا مر بظروف أصعب من كده ويقدر يواجهها.
منتظرين رأيكم أكتبوه في التعليقات.
