” مش هتلاقوا السجاير في السوق خلال 45 يوم” هذا ما قاله رئيس شعبة الدخان في الساعات الأخيرة، ليس هذا فقط بل أنه قال أيضا أن التجار كسبو من وراء هذه الأزمة نحو 100 مليار جنيه.
بس ياترى هو رئيس شعبة الدخان قال ايه تاني؟ وايه حل الأزمة الموجودة؟ وايه هو السعر الحقيقي للسجاير؟
ازمة السجاير كل يوم بتزيد واسعارها بترتفع كل يوم عن اليوم اللي قبله، ده غير أنها مبقتش موجودة في السوق أصلا ولحد دلوقتي مش عارفين سبب الازمة ايه بالظبط
بس ده خلى ناس كتير تسأل هي الأزمة دي هتخلص امتى؟
لكن واضح كده إن الأزمة لسه هتبدأ، وده لأن إبراهيم إمبابي رئيس شعبة الدخان باتحاد الصناعات، قال في برنامج على مسئوليتي، إن سوق السجاير في انتظار ازمة كبيرة خلال 45 يوم من دلوقتي
وقال إن أسعار السجاير بترتفع كل ساعة مش كل يوم وأزمة توافرها في السوق بعد 45 يوم يعني ممكن السجاير تختفي خالص خلال الفترة دي، والتجار مش حاسين لسه بالأزمة اللي هتحصل، عشان كده لازم تدخل عاجل من الجهات الحكومية لأن السوق دلوقتي بيمر بأزمة حقيقية
ولما إتسأل عن مكاسب الدولة من بيع السجاير؟
قال إن الدولة بتاخد 40 جنيه على كل كيلو تبغ وإن اللي بتحصله الدولة من ضرايب شعبة السجاير بيدخل في مجالات تانيه عشان كده لازم نهتم بالقطاع ده ونحل الأزمة الموجودة بشكل عاجل
وقال كمان إن لازم يكون في تحرك من البرلمان والحكومة إذا وصل سعر السجاير الشعبية لـ 50 جنيه، خصوصا إن في 51 مصنع بيشتغلوا في صناعة السجاير وانتاجهم ماشي بشكل طبيعي
وقال إن في حالة تدخل البرلمان والحكومة أسعار السجاير هتتراجع وعبوة سجاير كليوبترا هتوصل لـ 28 جنيه بدل من 50 جنيه وده السعر الحالي ليها، وكمان هتنخفض علبة إل إم لـ 52 بدل من 75جنيه
ده قال كمان إن بعض التجار بقوا بيخزنوا كميات كبيرة من السجاير بتوصل لـ 500 كرتونة وده عشان يرفعوا أسعارها لحد ما وصل مكسبهم على العلبة دلوقتي لـ 25 جنيه لانهم بيبعتبروها استثمار وبيبعوا العلبة بضعف تمنها لدرجة ان علبة الميريت بتتباع دلوقتي ب80 جنيه
والمفاجأة بقى: أنه قال إن مكاسب التجار من ازمة السجاير وصلت لـ 100 مليار جنيه ايوة كسبوا 100 مليار من السجاير وده لأننا بننتج 85 مليار سيجارة يعني 4 مليار علبة سجاير والمكسب في كل علبة 25 جنيه وبكده مكسب التجار يكون 100 مليار جنيه
لكن دلوقتي لو في تاجر تم ضبطه بتخزين السجاير عشان يكسب منها ويبعها بسعر أعلى من الحقيقي، هيتمنع بعد كده من الحصول على اي سجاير من انتاج شركة الشرقية للدخان اللي بتنتج سجاير كليوبترا
وبحسب تصريحات هاني أمان الرئيس التنفيذي لشركة الشرقية للدخان، أكبر منتج للسجاير في مصر، ارتفاع أسعار السجاير الموجودة حاليا في السوق محصلش قبل كده وده لأن علبة السجاير تخطت حاجز الـ 50 جنيه رغم إن الشركة بتطرحها بـ 24جنيه
وقال كمان إن الشركة مش مسئولة عن أي زيادات بتحصل ومن شهر مارس لحد دلوقتي مزودتش أسعارها
وعشان كده هتتخذ بعض الإجراءات عشان تخفض أسعار السجاير وتحل الأزمة دي بسرعة، ومن المفروض إن آثار الانفراجة دي تظهر بعد اسبوعين او تلاتة وده طبعا هيكون له تاثر قوي في السوق وهيظبط الأسعار ، حسب موقع المصري اليوم
ودلوقتي قولنا شايف مين سبب ازمة السجاير؟
