محدش يقدر ينكر ما حققه السد العالى فى تاريخه الكروى،وعندما نشاهد أى مباراة أحيانا نقول ولا يوم من أيامك يا حضرى.
أرقص يا حضرى..ياما شجعنا وهتفنا فى المدرجات للحضرى بنشجعه وبنقولهالوا أرقص يا حضرى،الجمهور بيقول للشاطر يا شاطر فى عينه ولا إيه؟
أحنا عارفين كده، لكن الحضرى فاجئ الجمهور فى الساعات اللى فاتت بتصريحات غريبة،قبلت الزمالك وجمهور الزمالك عليه مش هتصدق قال إيه على إنتقاله للزمالك وكشف أسرار لأول مرة هتعرفها فى التقرير التالي:
اللى بيحب الحضرى لشخصه هيحبه لو بيلعب فى أى نادى أهلى بقى زمالك ،إسماعيلى مش هتفرق،وراه وراه فين ما يروح،واللى بيشجع نادى بعينه هشجع النادى بغض النظر الحضرى إتنقل له أو لا مش هيشغله أوى النتقلات دى .
الساعات اللى فاتت عصام الحضرى كان له بعض التصريحات اللى خلت جمهور الأهلى فخور برأيه بس بعد إيه بقى يا حضرى ،وأه عندك حق، وجمهور الزمالك اللى أتقلب عليه.. ليه قال إيه؟ هقولك
عصام الحضرى فى تصريح له فى برنامج اللعيب على قناة أم بى سي مع الإعلامى مهيب عبد الهادى فاجئ كل الجماهير وقال أنا لعبت في النادي الأهلي 14 سنة، وفزت بجميع البطولات مع النادي، وبعد رحيلي عن الأهلي، حققت 12 بطولة، سواء مع المنتخب الوطني أو الأندية التي لعبت لها.
كمان قال إنه أخطأ لما رحل عن الأهلي، ولو كان في حد نصحه مكنتش رحل أبدا عن الأهلى، ولكن في الوقت ده محدش كان بينصح حد،وإنه مقالش لحسن شحاتة، على قرار رحيله عن الأهلي، رغم أنه الأب الروحي بالنسبة له.
الحضرى عبر عن ندمه ده وقال كان نفسي أرجع النادي الأهلي لأنه بيتي ولكن الموضوع كان صعب بسبب قرارات الإدارة اللى بحترمها،وندمت على الانضمام للزمالك، لأني في الفترة دى بعض جماهير الزمالك، كانوا شايفين أن النادي مش محتاج للتعاقد مع حارس مرمى جديد، رغم إنها حصلت كتير قبل كده ولا هى جت على الحضرى ووقفت؟
أنا راجل محترف طالما لبست التيشيرت بتاعك إتنمائى كله هيكون ليك ،وحب يفكر الجمهور وقال إنه مر بالتجربة دى مع الإسماعيلى وكانت أحسن 3 مواسم فى الكروة فى تاريخه مع الإسماعيلى.
مهيب قال للحضرى،ياحضرى متكروتنيش ندمت على وجودك فى الزمالك نعم أم لا؟
الحضرى قاله أنا كنت غير موفق وبعيد عن مستواي الفني، خلال فترة وجودي بالقلعة البيضاء وكنت أتمنى الظهور بمستوى أفضل من اللى ظهرت عليه خلال فترة وجودي في الزمالك.
ولكن هو وضح للجمهور كلامه أكتر وقال إنه ندمان على عدم توفيقه طول ال4 شهور فى الزمالك مش على التحاقه بالزمالك،كمان إن حظه كان فى فترة النادى كان فيه مشاكل وعدم إستقرار فى الإدارة.
وأكد الحضرى فى حوارات سابقه له إنه مسابش الأهلى بسبب الماديات بس ،ولكن كان فى أسباب تانية كتير خلته يعمل كده منها خلافاته مع جوزيه وإنه كان نفسه يحترف.
الغريب تصريحات مرتضى منصور عن الحضري لما قال بالفعل هو أفضل حارس مرمى أنجبته الملاعب المصرية، ولكن بشرط أن يكون مصاحب له خلال مبارياته الجان وقال لما إتعاقد معاه في الزمالك بلغه إنه يجى مع جامايكا علشان يتألق فى الزمالك.
ولكن الحضرى قال إنه عمره ما إعتمد على الحجاب ولا شغل العرافين زى ما بيتقال فى لعبه وإن حجابه هو القران
الحضرى فى تصريح سابق له مع راغدة شلهوب قال إن مرتضى منصور صنع كيان للزمالك من أول ما تولى رئاسة الزمالك ،ولو جاتله الفرصة للانضمام إلى الفريق الأبيض حاليا هيوافق ..فهل الحضرى ممكن يعملها وينضم للزمالك مرة تانية ولا سحب كلامه ومش فاكر إنه صرح بكده؟ إنتو كمان إيه رأيكوا فى تصريحات الحضرى معاه ولا ضده؟
